"Kanadalı nazirin bəyanatı qərəzlidir və regionda vəziyyəti yenidən gərginləşdirməyə yönəlib" - DEPUTAT

"Kanadanın xarici işlər naziri Melani Jolinin sentyabrın 22-də Azərbaycana qarşı qərəzli bəyanatı ölkəmizə qarşı başlanılan qarayaxma kampaniyasının tərkib hissədir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, kanadalı nazir bəyanatda ermənilərin Azərbaycanın Qarabağ bölgəsini guya məcburi şəkildə tərk etməsi barədə əsassız ittihamlar səsləndirir:

"Azərbaycana qarşı başlanılan qarayaxma kampaniyasının tərkib hissəsi olan bu əsassız bəyanat qərəzlidir və regionda vəziyyəti yenidən gərginləşdirməyə, sülh müqaviləsinin imzalanma prosesini ləngitməyə yönəlib. Bu günə qədər Ermənistanın azərbaycanlılara qarşı törətdiyi soyqırımlara, vəhşiliklərə səsini çıxarmayan və Azərbaycan torpaqlarının otuz il işğal altında saxlamasına göz yüman Kanadanın ölkəmizə qarşı bu cür əsassız ittihamlar səsləndirməyə haqqı yoxdur. Görünür, Fransa kimi Kanada da Azərbaycanın öz gücünə ərazi bütövlüyünü və suverenliyini tam bərpa etməsi qəbulana bilmir. Məhz buna görə də bölgədə yenidən münaqişə yaratmağa çalışır".

Deputat vurğulayıb ki, bu gün humanizm"dən danışan ölkələr və təşkilatlar niyə bu günə qədər Ermənistanın soydaşlarımıza qarşı törətdiyi vəhşiliklərə və soyqırımlara qarşı bu cür səssiz qalıblar:

"Səbəb bəllidir. 30 il ərzində Azərbaycana qarşı aparılan işğalçılıq siyasətinə göz yumanlar bu gün Ermənistan üçün səfərbər olublar. Qərb ölkələrin cənubi Qafqazdakı siyasəti və ölkəmizə qarşı ikili standartlarla çıxış etməsi regionda davamlı sülhün əldə edilməsinə ciddi maneə yaradır. Humanitar yardım adı altında Ermənistanın silahlandırılması bölgədə yenidən gərginliyi artırır və mövcud problemləri daha da dərinləşdirir. Ermənistan rəhbərliyi anlamalıdır ki, sülhdən başqa yol yoxdur. Bu gün sülhdən imtina Ermənistanın məhvi deməkdir. Yaxşı olar ki, Ermənistan rəhbərliyi cənab prezident İlham Əliyevin məsləhətlərinə qullaq assın və tezliklə sülh müaqviləsini imzalasın".

Telegramda izləyin