"Parkovşiklər"i bəzi dövlət məmurları himayə etdiyi üçün belə rahatdırlar - AÇIQLAMA

Bakı sakinlərini tıxaclar, tez-tez bağlanan yollarla yanaşı qanunsuz şəkildə fəaliyyət göstərən "parkovşiklər" də narahat edir. Yollarda qanunsuz fəaliyyət göstərən bu şəxslər sürücülərlə yanaşı piyadaları da narahat edirlər. Belə ki, onlar yol kənarında, dayanacaqlarda dayanan piyadaların üstünə gedərək, harda dayanmalı olduqlarını əmr edirlər.

Bəs görəsən bu şəxslər kimlərdən cəsarət alaraq yollarda "hökmranlıq" edirlər ?

Mövzu ilə bağlı Sonxeber.az-a açıqlama verən nəqliyyat eksperti Elməddin Muradlı bildirib ki, bu şəxsləri bəzi dövlət məmurları himayə etdiyi üçün belə rahatdırlar:

"Bəzi şəxslər özlərini dövlətdən üstün tutmağa çalışırlar. Müstəlif adlardan, basqılardan istifadə edərək özbaşına şəkildə bu işi görürlər. Heç kəs dövlətdən üstün deyil. Dövlətin qoyduğu qaydalar elədir ki, parklanma yerləri yalnız dövlət nəzarətindədir. Şəhər bir neçə zonaya bölünüb və parkinq qiymətləri də buna uyğunlaşdırılıb. Sürücülər səhərdən axşama qədər və şənbə günü də daxil olmaqla avtomobillərini saxladıqları üçün "azparking"ə pul ödəyirlər. Ödənişlər isə nağdsız şəkildə həyata keçirilir. Müəyyən olunmayan zonalarda və həftə içi saat 22:00-dan saat 07:00-dək, həftənin bazar günü avtomobillərin parkinqi üçünsə ödəniş tələb olunmur. Qanunsuz fəaliyyət göstərən "parkovşiklər" bazar günləri gəlib yenə özbaşına şəkildə parklanma yerlərində işləyirlər. Vətəndaşlardan zorla pul alırlar. Axşam saat 10-dan sonra parklanma pulsuz olduğu halda sürücülərdən yenə pul istəyirlər. Bunun arxasında isə dövlət məmurları dayanır. Ola bilsin bəzi dövlət məmurları və ya keçmiş dövlət məmurları onları himayə edir. Hansı ki, onlar indi heç bir işlə məşğul deyillər və sadəcə keçmiş ad, vəzifə, nüfuz, kimlərinsə qohumu olmaqlarından istifadə edirlər".

Bu qanun pozuntularının qarşısının alınması üçün hansı tədbirlər görülür?

"Qeyd edilən qanun pozuntusuna görə İnzibati Xətalar Məcəlləsinin müvafiq maddəsinə uyğun olaraq qanunsuz parklanma işini təşkil edən şəxslər barəsində inzibati tənbeh tədbiri və cərimələr tətbiq edilir".

Çiçək Sadatova

Telegramda izləyin

instagramda izləyin