Bakıda bu binaların qiyməti süni formada ARTIRILIR - AÇIQLAMA

2016-cı ildən etibarən Bakıda köhnə, istismar müddətini bitirmiş və qəzalı vəziyyətdə olan binalar sökülərək yenibinalar ilə əvəzlənib. Hazırda Bakıda minlərlə istismar müddətini bitirmiş köhnə çoxmənzilli bina var. Bakı günü-gündən inkişaf edir. 2, 5, 7 və 9 mərtəbəli köhnə binalar istismar müddətini bitirsə də hələ də onlardan istifadə edilir.

Bəs Bakıda aparılan söküntü işləri mənzillərin bahalaşmasına səbəb ola bilərmi? Mövzu ilə bağlı Sonxeber.az-a danışan əmlak məsələləri üzrə ekspert Elnur Fərzəliyev deyib ki, paytaxt Bakı şəhərində bəzi rəqəmlərə görə 11 minə yaxın istismar müddətini bitirmiş köhnə çoxmənzilli yaşayış binaları var:

"Həmçinin paytaxtın mərkəz və mərkəzə yaxın ərazilərində fərdi yaşayış evlərindən ibarət olan çox böyük yaşayış massivləri var ki, onlar istismar müddətini bitirmiş və şəhərin xarici estetik gözəlliyinə xələl gətirir. 2016-cı ildən başlayaraq Nazirlər Kabinetinin 86 saylı sərəncamına əsasən paytaxt Bakı şəhərində istismar müddətini bitirmiş və qəzalı vəziyyətdə olan köhnə çoxmənzilli yaşayış binalarının söküntüsü prosesi davam edir. Bu günə qədər onlarla çoxmənzilli yaşayış binaları sökülüb. Artıq 2023-cü ilin dekabr ayında Bakı şəhərinin baş planı təsdiqləndi. 2040-cı ildə Bakı şəhəri baş planda göstərildiyi kimi tikilib təhvil verilməlidir. Köhnə binalar sökülərək əvəzində yenitikili binalar ilə əvəzlənəcək. Digər hissəsi isə dövlət ehtiyacları üçün alınaraq infrastruktur üçün istifadə olunacaq".

Ekspertin sözlərinə görə, mənzillərin söküntüsü köhnə tikili binalara olan tələbatı artırır. Köhnə tikili binalar ipoteka kreditinə çevrilməsə də onların süni formada qiymət artımı davam edir:

"Bu tip binalardan mənzil alan şəxslər daha çox yatırım üçün mənzilləri alaraq onların söküntüsünü gözləyir. Hər hansı bir köhnə tikili bina sökülərkən onun yerində inşa olunan yeni tikili binada vətəndaşın otaq sayına uyğun daha böyük sahəsi olan mənzillər təqdim olunur. Bu mənzillərin bazar dəyəri vətəndaşın köhnə mənzilindən daha baha qiymətə bazarda dəyərləndirilir. Bundan əlavə, vətəndaşın evi sökülərkən ona yeni mənzil verilən günə qədər ortalama 2-3 il müddətinə vətəndaşa hər ay kirayə və köç xərcləri ödənilir. Bu baxımdan söküntülərin sürətlənməsi daha çox ona görə vacibdir ki, sökülən binalar daha çox qəzalı vəziyyətdə olan binalardır. Hər hansısa bir zəlzələ yaxud təbii fəlakət baş verərsə, ilk olaraq qəzalı vəziyyətdə olan binalar zərər görmüş olacaq. İnsan tələfatı bu zaman qaçınılmaz olacaq. Vətəndaşların özləri də onların qəzalı vəziyyətdə olan binaların sökülməsinə maraq göstərməlidir. Bu onlara gələcəkdə baş verə biləcək hər hansı bir təhlükədən qorumuş olur. Başqa bir tərəfdən vətəndaşın əmlakının dəyəri iki dəfəyə qədər yeni mənzillər ilə dəyərləndirilir".

Sevda Səfərova

Telegramda izləyin