Bu restoranlar 2500 manat CƏRMƏLƏNƏ BİLƏR - AÇIQLAMA

Bakıda bir çox restoran müştərilərinə açıq havada xidmət göstərir. Xüsusilə də yay aylarında insanlar restoranların həyətində oturub yeyib-içməyə, əylənməyə üstünlük verirlər. Kafelərdən, şadlıq evlərindən ətrafa yayılan səs-küy isə sakinləri narahat edir. Ancaq nə restoran sahibləri, nə də qonaqlar ətrafda yaşayanları narahat etdiklərini düşünür.

Bəs görəsən bu restoran sahiblərini hansı cəza gözləyir ?

Mövzu ilə bağlı Sonxeber.az- a açıqlama verən hüquqşünas Emil Aslanov bildirib ki, restoran sahibləri bu səbəblə cərimə edilə bilər:

"Kafe və restoranlarda gecə vaxtı yüksək səslə musiqi ifa olunması, hər hansı yüksək səs Inzibatı Xətalar Məcəlləsinin 521-ci maddəsində qeyd edilən məişət səs-küyünə qarşı mübarizə qaydalarının pozulması maddəsi ilə inzibati qaydada tənbeh edilə bilir. Bu maddədə qeyd edilir ki, mənzillərdə, yaşayış evlərinin girişlərində, həyətlərdə, istirahət yerlərində və digər ictimai yerlərdə gecə vaxtı saat 00-00-dan səhər 7-dək səs-küy salmağa, mahnı oxumağa, musiqi alətlərini ucadan çalmağa və maqintafonları gur səslə oxutmağa görə fiziki şəxslər 150 manatdan 300 manata qədər məbləğdə, vəzifəli şəxslər isə 2000 manatdan 2500 manata qədər məbləğdə cərimə edilə bilirlər".

Keçmiş sahibkar Elşən Behbudov deyir ki, istənilən halda insanları narahat etmək olmaz:

"İstənilən halda ətrafdakı insanları narahat etməməli, dincliyini pozmamalı və qonşularda diskonfort yaratmaq olmaz. Mən bir zamanlar gecə yarıya qədər fəaliyyət göstərən klub işlədirdim. Saat 00:00-dan sonra səsin çölə çıxmaması üçün səs ucaldıcı avadanlıqları tənzimləyirdim".

"Belə hallarla rastlaşan vətəndaşlar Bakı Şəhər İcra Hakimiyyətinə yerli icra strukturlarına müraciət etməlidirlər" ,- deyə Azad İstehlakçılar Birliyinin Sədri Eyyub Hüseynov saytımıza açıqlamasında bildirib.

Telegramda izləyin