Azərbaycanda kişi arvadı ilə münasibəti olan dostunu döyərək öldürdü

Masallı rayonunda 1996-cı il təvəllüdlü Sərxan Abbasov mübahisə zamanı həmkəndlisi Rahib Muradovu (adlar şərti verilib - red.) öldürüb.

Teleqraf.com-un məlumatına görə, Sərxan bu il yanvarın 21-də saat 23 radələrində Masallı rayonunun kəndində evinə gəlib. O, qapını döyərkən evdən ayaq səsləri eşidib və qapını açan arvadı Sevdadan bu barədə soruşub.

Sevda müxtəlif bəhanələr gətirib, təmirsiz olan otağa pişik girdiyini deyib. Sərxan əlindəki telefonun fənəri ilə otağa işıq salanda dostu və həmkəndlisi, 1994-cü il təvəllüdlü Rahibin orada gizləndiyini görüb. O, Rahibi dəhlizə çıxarıb, hansı səbəbdən evinə gəldiyini soruşub.

Cavab verə bilməyən Rahibin Sevda ilə sevgi münasibətində olduğunu və arvadının xəyanət etdiyini başa düşüb. Dostunun sifət və baş nahiyələrinə ardıcıl yumruq-təpik zərbələri vurub.

Rahibin oraya gəlmiş şəxslərin köməyi ilə Masallı Rayon Mərkəzi Xəstəxanasına çatdırılmasına və tibbi yardımlar göstərilməsinə baxmayaraq o, aldığı xəsarət səbəbindən yanvarın 27-də ölüb.

İstintaq orqanı tərəfindən Sərxanın barəsində Cinayət Məcəlləsinin 126.3-cü (qəsdən sağlamlığa ağır zərər vurma - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham elan edilib.

Cinayət işi üzrə təqsirləndirilən şəxs qismində ifadə verən Sərxan ona elan olunmuş ittiham üzrə özünü təqsirli bilib.

O qeyd edib ki, Rahib həmkəndlisi olmaqla yanaşı dostu və sinif yoldaşı olub:

"Rahib Bakı şəhərində özünə məxsus avtomobillə taksi fəaliyyəti ilə məşğul olur, həftəsonu isə kəndə qayıdırdı. Masallıya gələndə çox vaxt mənimlə əlaqə saxlayardı ".

"Yanımızda olacağını dedi"

Təqsirləndirilən şəxsin sözlərinə görə, yanvarın 21-də saat 14 radələrində Rahib mobil telefonuna zəng edib və Masallı rayonuna gəlmək istədiyini deyib:

"O, Bakı şəhərinin Qaradağ rayonu ərazisində olduğunu, Masallının Ərkivan qəsəbəsinə sərnişin gətirdiyini dedi, dostumuz Pərvizlə saat 21 radələrində restoranların birində əyləşib onu gözləməyimizi istədi.

Mən Pərvizlə kənd ərazisində olan restorana gedib orada çay içdik və Rahibi gözləməyə başladıq. Rahibin gəlmədiyini görəndə Pərviz ona zəng edərək harada olduğunu soruşdu. O, Ərkivan qəsəbəsi ərazisində olduğunu, bir neçə dəqiqəyə yanımıza gələcəyini dedi. Buna görə çay içib, onu gözləməyə davam etdik.

Bir neçə dəfə Rahiblə telefon əlaqəsi saxlamağa çalışmağımıza baxmayaraq o, zəngləri açmadı, artıq gec olduğunu nəzərə alıb saat 23 radələrində Pərvizlə restoranı tərk etdik".

"Pişik olduğunu dedi"

Sərxan qeyd edib ki, kənd ərazisində Pərvizlə vidalaşıb və evinə gedib:

"Mən telefonda oyun oynaya-oynaya evimə çatdım. Həyətə girəndə dəmirdən olan giriş qapısının bağlı olduğunu görüb qapını döyməyə başladım. Bir neçə saniyə sonra arvadım Sevda qapını açdı.

Sevda qapını açanadək mən çöl tərəfdə gözləyərkən evin içərisindən ayaq səslərinə oxşar səs gəldiyini eşitdim. Sevda qapını açıb məni sakit tərzdə qarşıladı. Mən də arvadımla hal-əhval tutaraq içəri keçdim. Ondan evdən ayaq səsləri gəldiyini, həmin səslərin nə olduğunu soruşdum. Arvadım mənə təmirsiz otağa qonşudan pişik girə biləcəyini dedi.

Qeyd edim ki, maddi imkanım zəif olduğundan 2 otaqdan ibarət evin ancaq yataq otağını təmir edə bilmişəm. Tavanı və qapısı olmadığı üçün qapı yerinə pərdə asılıb. Arvadım pişik ehtimalını dedikdə təmirsiz otağa daxil oldum. İşıq olmadığı üçün telefonumun fənəri ilə həmin otaqda pişiyi axtarmağa başladım. Bir nəfəri üzü divara əlləri ilə başını tutmuş vəziyyətdə gördüm.

Onun kurtkasının qolundan tutaraq evin dəhlizinə çıxardım. İşıqda Rahibi tanıdım. Ondan evimdə nə işi olduğunu soruşdum. Heç bir cavab vermədiyini, sadəcə qorxudan əsdiyini gördüm. Təkrar ondan evimdə nə işi olduğunu soruşsam da, sualıma yenə cavab vermədi".

"Dostuma zəng etdim"

Sərxanın ifadəsinə görə, Rahibin arvadı Sevda ilə əlaqəsinin olmasını güman edib və qeyri-ixtiyari Rahibin üz nahiyəsinə bir neçə yumruq zərbəsi vurub:

"Zərbələrin təsirindən Rahib yıxıldı. Sevdadan Rahibin burada nə elədiyini soruşdum, cavab vermədiyini görəndə ona da bir şillə vurdum. Rahibi vurduğumu görən arvadım Sevda qonşuluqda yaşayan atasını çağırmaq üçün evdən getdi. Dostum Pərvizə zəng edərək bizə gəlməsini xahiş etdim.

Sonra yerdə dizləri üstə əlləri ilə üzünü tutan Rahibin baş və üz nahiyəsinə dayanmadan yumruq zərbələri vurmağa başladım. Rahib müqavimət göstərərək sinə nahiyəmə zərbə vursa da, onun müqavimətini qırdım. Təxminən 15-20 dəqiqə Rahibin baş və üz nahiyələrinə çoxsaylı zərbələr vurmağa davam etdim.

Rahibə zərbələr vurub hirsimi çıxdıqdan sonra mətbəxə keçdim və bıçaq götürərək dəhlizə qayıtmaq istədim. Atamın, anamın və Sevdanın artıq evdə olduqlarını gördüm. Atam əlimdəki bıçağı aldı və özümə gəlməyim üçün üzümə şillə vurdu. Bıçağı alıb məni kənara itələdi".

"Məqsədim öldürmək olub"

Sərxan qeyd edib ki, daha sonra atası ondan nə baş verdiyini soruşub:

"Ona olanlar barədə məlumat verdim. Atam səbirli olmağımı, növbəti gün hər şeyin aydınlaşacağını dedi. Evdə ailə üzvlərim olmasına baxmayaraq Rahibə təkrar bir neçə yumruq zərbəsi vurdum. Bir-iki dəqiqə sonra isə Pərviz və digər sinif yoldaşım Rasim yaşadığım evə gəldilər.

Pərviz Rahibə yaxınlaşaraq ondan mənim evimdə nə işi olduğunu soruşdu. Rahib ona da cavab vermədi. Pərvizin ürəyi xəstə olduğu üçün halı pisləşərək yerə yıxıldı. Mən Rasimlə birlikdə Pərvizi rayon mərkəzi xəstəxanasına apardıq.

Atam isə Rahibin oğurluq məqsədi ilə evə girməsini düşündüyü üçün polisə məlumat verdi. Polis əməkdaşları gələrək Rahibi rayon mərkəzi xəstəxanasına apardılar. Yanvarın 27-də onun xəstəxanada öldüyünü eşitdim. Rahibi vurmaqda məqsədim onu öldürmək idi".

"Niyə döyülməsini mənə demədilər"

İş üzrə zərərçəkmiş Rahibin hüquqi varisi qismində ifadə verən həyat yoldaşının sözlərinə görə, Rahiblə 2019-cu ildə evlənib, bu evlilikdən iki uşaqları doğulub:

"Ərim bir neçə gün ağır vəziyyətdə reanimasiya şöbəsində qaldıqdan sonra yanvarın 27-də xəstəxanada öldü. Hadisədən sonra bildim ki, Sərxan yanvarın 21-də Rahibi evində tutub və onu döyüb".

"Cinsi əlaqədə oldum"

İş üzrə şahid qismində adı keçən Sevdanın sözlərinə görə, əri Sərxan və iki azyaşlı uşağı ilə birlikdə Masallı rayonun kəndində yaşayıb:

"2023-cü ilin dekabrın 27-də Sərxanın dostu Rahiblə "TikTok" sosial şəbəkəsində danışmağa başladıq. Daha sonra yaxın münasibətlərimiz yarandı. Müxtəlif vaxtlarda, ərimin evdə olmadığı hallarda bizə gəlirdi və cinsi əlaqədə olurduq.

Sonuncu dəfə Rahiblə gecə saatlarında Sərxan dostları ilə restoranda olduğu zaman evdə cinsi əlaqədə olmaq barədə razılaşdıq. Rahib gecə saat 23 radələrində mesaj yazaraq evin həyətinə çatdığını dedi. Mən onu qarşıladım. Evin həyətində cinsi əlaqədə olmağı təklif etsəm də, havanın soyuq olması ilə əlaqədar evə getmək istədiyini dedi. Mən də razılaşdım".

"Otaqda gizlənməsini bildi"

Sevda qeyd edib ki, daha sonra Rahibə Sərxan və ortaq dostları Pərviz zəng edib və restorana çağırıblar:

"Bir neçə dəfə Rahib onlara gələcəyini desə də, sonra mobil telefonunu səssiz rejimə qoydu. Rahiblə cinsi əlaqədə olduqdan sonra evin dəhlizində döşəmənin üzərində oturaraq söhbət etməyə başladıq. Təxminən yarım saat sonra qapının döyülməsini eşidəndə Sərxanın evə gəldiyini dedim. Rahib özünü itirərək evin təmirsiz olan otağına keçdi. Otağın taxtaları bərkidilmədiyi üçün səs saldı. Sərxan telefonla təmirsiz otağa işıq salanda Rahibi gördü".

Bu cinayət işinə Lənkəran Ağır Cinayətlər Məhkəməsində baxılıb. Məhkəmənin hökmü ilə Sərxan 9 il 6 ay müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.

Telegramda izləyin

instagramda izləyin