Ev işlərinə görə qadınlara əmək stajı VERİLƏ BİLƏRMİ? - AÇIQLAMA

Ölkəmizdə evdar xanımların sayı az deyil. Evdar xanımlar ailələrin möhkəmləndirilməsində mühüm rol oynayır. Onlar ev işləri ilə məşğul olur, uşaqlarını böyüdürlər. Xüsusilə kənd yerlərində yaşayan evdar qadınlar işi daha ağırdır. Evdar xanımlar ailələrin möhkəmləndirilməsində mühüm rol oynayır. Onlar işsiz olduğu üçün maddi-sosial təminatlarının gücləndirilməsi vacibdir.

Evdar xanımların rəsmi iş yeri olmadığından əmək pensiyasından yararlana bilmirlər. 64 yaşı tamam olanda evdar xanımlara yaşa görə pensiya təyin olunur. Bu baxımdan evdar xanımların maddi-sosial təminatlarının yaxılaşdırılması üçün onlara ayrıca pensiya təyin oluna bilərmi? Evdar qadınlar evdə işlədikləri üçün bu onlara əmək stajı kimi sayıla bilərmi?

Mövzu ilə bağlı Sonxeber.az-a danışan sosioloq Mətanət Məmmədova deyib ki, , evdar qadınlar evdə işlədikləri üçün bu, onlara əmək stajı sayıla bilməz. Çünki gündəlik ev işləri ilə həm evdar, həm də işləyən qadınlar məşğul olur.

"Kənd yerlərində evdar qadınlar əkin əkir, çörək bişirir, şəhər yerlərində evdar qadınlar isə bazara gedir, uşaqları baxçaya, məktəbə aparıb-gətirir. Ümumi işlər isə həm kənd, həm də şəhərdə yaşayan evdar qadınlar üçün eynidir. Məsələ buradadır ki, sadalanan işləri işləyən qadınlar da görür. Yəni kənddə yaşayan işləyən qadın həm də əkin əkir, çörək bişirir. Şəhərdə yaşayan işləyən qadın isə vaxt tapıb bazara gedir, market alış-verişlərini edir. Səhər evdən tez çıxıb uşaqları baxçaya, məktəbə qoyur, axşamçağı işdən çıxıb qaçaqaçla uşaqları götürür. Gündəlik ümumi işlər isə, yenə də kənddə də, şəhərdə də eynidir".

Sosioloqun sözlərinə görə, işləyən qadının vəziyyəti evdar qadının vəziyyətindən çox ağır olur:

"Bu nöqteyi-nəzərdən də evdar qadınlara ev işləri üçün staj verilə bilməz. Bu, işləyən qadınların haqqının tapdalanması olar. Ən yaxşı hal bu ola bilər ki, yeni formalaşmış parlament qadınların pensiya yaşı ilə əlaqədar məsələ qaldırsın. Və onların pensiya yaşı xeyli azaldılsın. Bu həm evdar, həm də işləyən qadınların xeyrinə olar".

Telegramda izləyin