Məşhur fotoqraf oğlu tərəfindən öldürüldü

Dünyaca məşhur britaniyalı fotoqraf Pol Lou Kaliforniyada 19 yaşlı oğlu Emir tərəfindən bıçaqlanaraq öldürülüb.

Sonxeber.az xarici mediaya istinadən xəbər verir ki, hadisə şənbə günü San Qabriel dağlarında baş verib. Polis şübhəlinin avtomobillə hadisə yerindən qaçdığını, lakin qısa müddət sonra qəza törətdiyini bildirib. Emir Lou qətldə şübhəli bilinərək həbs edilib.

Pol Lou London İncəsənət Universitetinin professoru və dünya şöhrətli fotojurnalist idi. Karyerası boyu o, Berlin divarının yıxılması və Nelson Mandelanın sərbəst buraxılması kimi tarixi hadisələrin fotolarını çəkib. O, xüsusilə Sarayevo mühasirəsi zamanı çəkdiyi fotoşəkilləri ilə tanınırdı.

Həmkarları və dostları Lounu mehriban, həvəsli və cəsarətli bir insan kimi xatırlayırlar. Bosniya və Herseqovina səfirliyi onu "böyük sənətkar" adlandırıb.

Bu faciəli hadisə foto və jurnalistika aləmində böyük kədərə səbəb olub.

Hadisə ilə bağlı istintaq davam edir. Emir Lounun bu hərəkəti niyə etdiyi hələ məlum deyil. Yaxın günlərdə onun məhkəmə qarşısına çıxacağı gözlənilir.

Telegramda izləyin