"Fransanın bölgəni kölələşdirməyə yönəlik çirkin niyyətlərinə qarşı Azərbaycan regional və qlobal miqyasda fəal şəkildə mübarizə aparır"

"Fransanın anti-Azərbaycan siyasəti müxtəlif üsul və formalarla davam etməkdədir. Sözügedən dövlətin Ermənistandakı səfiri Olivye Dekotiyinin diplomatik normaları kobud şəkildə pozaraq ölkəmizin beynəlxaq hüquqa əsaslanan qələbəsinə kölgə salmaq cəhdləri və həqiqətləri təhrif etməsi qəbuledilməzdir".

Bunu Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib.

Deputat qeyd edib ki, rəsmi Paris mahiyyət etibarı ilə keçmiş Minsk qrupunun həmsədri olaraq Azərbaycan və Ermənistan arasında münasibətlərin xarakteristikasına dərindən bələd olan azsaylı ölkədən biridir:

"Buna görə də 44 günlük Vətən Müharibəsindən sonra Yelisey Sarayının davamlı xarakter almış qərəzli, Azərbaycanofob, islamafob, türkofob siyasəti ilk növbədə onların öz nüfuzuna xələl gətirir. Fransa tərəfsizlik prezumpsiyasına əməl etməməklə beynəlxalq hüququn norma və prinsiplərini kobud şəkildə pozur.

Rəsmi Paris regionda yaranmış yeni geosiyasi konfiqurasiyanı heç cür qəbul etmək istəmir. Bununla yanaşı Ermənistana həm siyasi, həm də hərbi dəstək verməklə gərginliyi artırır. Təbii ki, Makron administrasiyasının addımları Bakı və İrəvan arasında dayanıqlı sülhün əldə olunmasına maneə yaradır. Halbuki Azərbaycan işğala son qoymaqla Fransanın da aralarında olduğu ATƏT-in Minsk qrupunun vəzifələrini yerinə yetirib".

Deputat vurğulayıb ki, Fransa Cənubi Qafqazda neokolinalist siyasət həyata keçirməklə Afrikada üzləşdiyi uğursuzluqları kompensasiya etməyə çalışır:

"Cənubi Qafqaz Asiya ilə Avropa arasında mühüm bir keçid nöqtəsi olduğu üçün regionun geosiyasi əhəmiyyəti və enerji resursları Parisin diqqətini cəlb edir. Bunun üçün də Ermənistandan plasdarm kimi istifadə olunur. Fransanın bölgəni kölələşdirməyə yönəlik çirkin niyyətlərinə qarşı Azərbaycan istər regional, istərsə də qlobal miqyasda fəal şəkildə mübarizə aparır. Bu isə öz növbəsində Fransanın Cənubi Qafqaza nüfuz etmək imkanlarını məhdudlaşdırır".

Telegramda izləyin