"Dünyanın yaşıl gündəliyinə mühüm töhfə verən COP29 riyakar dairələrə böyük siyasi zərbə vurmağı bacardı" - Bəhruz Quliyev

"COP29-un Bakıda keçirilməsi Azərbaycanın böyük uğuru və ölkəmizin beynəlxalq nüfuzunun göstəricisidir. Bu tədbirin Azərbaycanda keçirilməsi həm region, həm də postsovet məkanı üçün əlamətdar hadisə sayılır. Dünyanı narahat edən çox önəmli hadisələrin müzakirəsi üçün platformanın Bakıda təşkil olunması onu deməyə əsas verir ki, paytaxtımız əlverişli məkandır. Azərbaycanın beynəlxalq tədbirlərin keçirilməsində əldə etdiyi təcrübə, o cümlədən iqlim dəyişmələri sahəsində təşəbbüsləri, həyata keçirilən real layihələr ölkəmizin tərəddüdsüz olaraq COP29-a ev sahibliyi etməsini təmin edib. Dünyanın yaşıl gündəliyinə mühüm töhfə verən COP29 tədbiri həm də riyakar dairələrə böyük siyasi zərbə vurmağı bacardı".

Bunu Sonxeber.az-a danışan SƏS Media Qrupun rəhbəri, siyasi analitik Bəhruz Quliyev deyib.

B.Quliyev qeyd edib ki, Prezident İlham Əliyev COP29-un açılış mərasimində çıxışı zamanı çox maraqlı mövzulara toxunub:

"Prezident qeyd edib ki, Azərbaycan çoxtərəfliliyin tərəfdarıdır, eyni zamanda, mədəniyyətlərarası dialoqda fəal rol oynayır. Multikulturalizmin dövlət siyasətimiz və həyat tərzimiz olduğunu vurğulayan dövlət başçısı Azərbaycan xalqının etnik, dini mənsubiyyətindən asılı olmayaraq, digər millətlərlə hər zaman ahəngdar şəkildə, bir ailədəki kimi yaşadığını qeyd edib. İki il əvvəl Azərbaycan və Avropa Komissiyasının Strateji tərəfdaşlıq haqqında razılaşmaya imza atdıqlarından danışan dövlətimizin başçısı xüsusi olaraq qeyd edib ki, bu, Avropa Komissiyasının təklifi idi. Çünki onlara bizim qazımız lazım idi. İxrac bazarlarından danışan Prezident bildirib ki, biz, digər mühüm enerji təhlükəsizliyi layihələrini həyata keçirməyə çalışırıq. Bunlardan biri Qara dənizin dibi ilə enerji kabelinin çəkilməsidir və bunun sayəsində Azərbaycan yaşıl enerjini Avropaya nəql edəcək. Azərbaycan Prezidenti çıxışında bəzi dairələrə mesaj göndərməyi də unutmayıb. Bildirib ki, onlar COP29-a qarşı boykot kampaniyası həyata keçirmək üçün əllərində olan bütün vasitələrdən istifadə edirlər. Buna baxmayaraq COP29-un 196 ölkədən 72 min qeydiyyata alınmış iştirakçısı var. Beynəlxalq tədbirin təşkili və keçirilməsində əldə edilən uğurlar antiAzərbaycan dairələrinə sarsıdıcı zərbə oldu və dünya birliyi Bakının yaşıl gündəliyinin zənginliyinə şahidlik etdi".

Telegramda izləyin