"Dövlət başçısı sammitin açılışındakı nitqi ilə COP29-un qarşısına qoyduğu hədəflərə aydınlıq gətirdi" - DEPUTAT

"Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası bu günə qədərki təşkil olunmuş sammitlərdən hərtərəfli olaraq fərqlənir. Hətta sammitdə iştirak edən siyasi liderlər də buna xüsusi olaraq diqqət ediblər. Bakı öhtəliyinə götürdüyü və təşkil etdiyi bütün beynəlxalq tədbirlərin hər zaman ən yaddaqalan olmağını və möhtəşəmliyini təmin edib".

Bunu Sonxeber.az-a danışan deputat Müşfiq Cəfərov bildirib.

Deputat qeyd edib ki, açılış mərasimində çıxış edən cənab Prezident İlham Əliyev COP29-un sədri kimi Azərbaycan inkişaf etmiş və inkişaf edən ölkələr arasında konsensusun tapılmasına töhfə verməyə çalışacağını qeyd edib:

"Dövlət başçısı sammitin açılışındakı nitqi ilə həm COP29-un qarşısına qoyduğu hədəflərə, qlobal iqlim problemi və onun həlli yollarına aydınlıq gətirdi, dövlətimizin beynəlxalq təşəbbüslərinə bəzi ölkələrin qısqanc, qərəzli münasibətlərini açıq-aşkar ifşa etdi.

Bu gün dünyanın müxtəlif ölkələrinin liderlərinin COP29 sammitində iştirak üçün Bakıda olması özü məhz dövlətimizə və onun global problemlərin həlli istiqamətindəki təşəbbüslərinə verilən dəyərdən və hörmətdən irəli gəlir. Həmçinin 196 ölkədən 72 min iştirakçının qeydiyyatdan keçməsi Bakının təşkil etdiyi sammitin mötəbərliyindən xəbər verir və bu da COP29-un uğurla davam etməsi deməkdir. Bu faktlar sammit öncəsi və indidə davam edən qarayaxma, boykot kampaniyasının iflasa uğradığının sübutudur.

Azərbaycanın başlatdığı meqalayihələrlə dünyada əksər köhnə kommunikasiyanın iflas etdiyini bilirik. Xüsusilə, Avrasiyada artıq enerjidaşıma yollarının dəyişdiyini görürük. Bu gün dövlətimiz beynəlxalq məsələlərdə təşəbbüslər irəli sürür, mötəbər tədbirlərə ev sahibliyi edir, tərəflər arasında vasitəçi rolunda çıxış edir və konkret olaraq böyük lahiyələrin həyata keçməsinin təminantçısına çevrilir".

Telegramda izləyin