"Valideyinlər telefon əvəzinə, övladlarını mükafatlandırmaq üçün onlara sevdikləri şirniyyatları təklif edə bilərlər" – PSIXOLOQ

Bu gün valideyinlər azyaşlı övladlarının tərbiyəsi zamanı müəyyən zərərli üsullardan istifadə edirlər. Bunlardan biri də mobil telefonlardır. Belə ki, valideyinlər övladlarını yemək yeməsi üçün, ağlayanda susması üçün telefonla "mükafatlandırırlar"

Bəs görəsən bu, gələcəkdə uşaqlarda hansı psixoloji problemləri yaradır?

Mövzu ilə bağlı psixoloq Aytən Ələkbərova Sonxeber.az – a açıqlama verib:

"Bu gün valideyinlərin uşaqlarının telefonla başlarını qataraq yedizdirməsi gələcəkdə onların doyma və doymama siqnallarının xaotik olaraq pozulmasına gətirib çıxarır. Eyni zamanda müəyyən yaş dövründə görürük ki, uşaqlar ya qışqıra-qışqıra danışır, ya da nitqləri ümumiyyətlə inkişaf etmir. Buna isə birbaşa səbəb elə məhz çox kiçik yaşlarından telefondan istifadə etmələridir. Bu gün valideyinlər 5-6 yaşlı uşaqları üçün həkimə, psixoloqa müraciət edərkən "Əsəbidir, fikirlərini çatdıra bilmir" deyirlər. Bizim də ilk sualımız o olur ki, yemək yeməsi üçün və ya ağlayanda susması üçün telefondan istifadəsinə icazə vermisizmi? Onlar da bunu təsdiqləyir. Biz artıq praktik cəhətdən bunu əminliklə deyə bilərik ki, bəli, azyaşlıların telefondan istifadəsi hətta əqli inkişafın geriliyinə belə səbəb ola bilir. Bundan əlavə bu, uşaqların gözlərinə də təsirsiz ötüşmür. Günümüzdə artıq 1-ci sinifdə oxuyan uşaqların əksəriyyəti eynəkdən istifadə edir.
Bu məqamlarda mütləq şəkildə uşağın acmasını onun özünün dərk etməsini təmin etmək lazımdır. Yəni o özü acsın və yemək istəsin. Valideyinin zoru və rüşvəti ilə deyil.
Valideyinlər telefon əvəzinə övladlarını mükafatlandırmaq üçün onlara sevdikləri şirniyyatları təklif edə bilərlər".

Çiçək Sadatova

Telegramda izləyin