"Fərdi yaşayış evlərinin qış aylarında alınması daha məqsədəuyğundur" - ƏMLAK EKSPERTİ

Günümüzdə vətəndaşlar ən çox ev alarkən böyük problemlərlə üzləşirlər. Əsasən də hazır tikililərə mürciət edən şəxslər, sonradan həmin tikilinin bərbad və yaşanmaz hala gəlməsi ilə üzləşə bilirlər. Bəs, sonradan belə hallarla qarşılaşmamaq üçün vətəndaşlar fərdi yaşayış evi alarkən nələrə diqqət yetirməlidir?

Mövzu ilə bağlı Sonxeber.az-a əmlak eksperti Elnur Fərzəliyev danışıb.

O, açıqlamasında qeyd edib ki, vətəndaşların özünün təmir-tikinti işləri ilə bağlı anlayışı olmadığı halda, evə baxış zamanı özləri ilə birlikdə peşəkar ustalar da apara bilərlər:

"Vətəndaşlar hər hansısa bir daşınmaz əmlakı alarkən, daha önəmlisi vətəndaş əgər fərdi yaşayış evi alırsa mütləq şəkildə önəm verəcəyi ilk məsələ, həmin fərdi yaşayış evinin sənədidir. Maksimal dərcədə çıxarışlı sənəd almalı, torpağın və tikilinin çıxarışı olmalıdır. Çünki, əksər hallarda bəzi vətəndaşlar torpağın çıxarışı olub və üzərində ev tikib satırlar. Amma tikilinin sənədi olmur, çünki, torpağın təyinatı kənd təsərrüfatı və ya digər təyinatlı torpaqlar olduğu üçün bunun üst tikilisinə çıxarış verilmir. Hər hansısa tikiliyə çıxarışın alınması üçün onun torpağının təyinatı ilə üstün təyinatı eyni olmalıdır. Bu baxımdan ilk önəm verəcəkləri məsələ çıxarışın olmasıdır. Daha sonr vətəndaşlar əgər, fərdi yaşayış evi alırlarsa, sözügedən evin tikintisinin keyfiyyətinə önəm verilməlidir. Vətəndaş aldığı ərazini əvvəlcədən araşdırmalıdır. Əgər, həmin fərdi həyət evlərin tikildiyi ərazilər bir zamanlar bataqlıq, gölməçə vəs, olub və qurudularaq belə evlər tikilibsə gələcəkdə bu tip evlərin çökməsi, çatlaması, təmirin bərbad vəziyyətə düşməsi qaçılmazdır. Əgər, vətəndaşın təmir və tikinti ilə bağlı tam anlayışı yoxdursa bu sahədə peşəkar ustalara müraciət edərək onlarla birgə evə baxış keçirdə bilərlər.
Vətəndaşlar aldıqları evin qiymətini dəqiq bilmək istəyirlərsə, öncəliklə həmin ərazilərdəki torpaqların satış qiymətlərini öyrənməli, daha sonra tikinti xərcini hesablayaraq evin qiymətini bazar qiymətinə uyğun olub-olmadığını müəyyənləşdirə bilərlər. Bundan əlavə keyfiyyətlə bağlı adətən insanlar fərdi həyət evlərini yay aylarında alırlar, amma fərdi yaşayış evlərinin soyuq, qış aylarında alınması daha məqsədəuyğundur. Soyuq aylarda əgər, mənzilin keyfiyyətsiz materiallardan istifadə olunubsa və yaxud tikinti keyfiyyətsiz formada aparılıbsa həmin evdə qış aylarında nəmişlik və təmirin bərbad günə düşməsi anında hiss olunacaq. Daha yaxşı olar ki, vətəndaşlar ev alarkən, əvvəlcədən yaşayış olmuş mənzillərə müraciətlər etsinlər".

Vüsalə İbrahimli

Telegramda izləyin