Ermənistan-Fransa arasındakı hərbi əməkdaşlıq bölgə üçün yeni təhlükə yaradarsa adekvat tədbirlər görmək zəruri olacaq" - DEPUTAT

Xəbər verdiyimiz kimi Ermənistan və Fransa arasında 2025-ci il üçün müdafiə sahəsində əməkdaşlıq proqramı imzalu barədə məlumatı Ermənistan Müdafiə Nazirliyinin mətbuat xidməti məlumat yayıb.

Mövzu ilə Sonxeber.az-a danışan deputat Elçin Mirzəbəyli bildirib ki, Ermənistanla Fransa arasında imzalanan proqram ilk deyil. Bundan öncə də belə bir proqram imzalanmışdı:

"Fransanın Ermənistanı silahlandırdığı, regionda yeni münaqişə ocağı yaratmaq istəməsi heç kimə sirr deyil. Bilirsiniz ki, Fransa təkcə öz resursları ilə Ermənistana hərbi dəstək vermir. Eyni zamanda digər ölkələri də prosesdə iştirak etməyi təhrif edir. Bugünkü şəraitdə Fransa tərəfindən atılan addımlar bu ölkənin də üzv olduğu nə Avropa İttifaqının elan etdiyi prinsiplərə, nə BMT-nin Təhlükəsizlik Şurasının daimi üzvü kimi üzərinə götürdüyü öhdəliklərə uyğun gəlmir. Reallıq odur ki, regionda hərbi balansı dəyişmək üçün atılan addımlar tək Azərbaycan üçün deyil, bütün bölgə dövlətləri üçün təhlükə yaradır. Ermənistanın Fransa ilə bu sahədəki əməkdaşlığı bölgə üçün yeni təhlükə yaratmağa xidmət edəcəksə bu istiqamətdə adekvat tədbirlər görmək zəruri olacaq".

Deputat vurğulayıb ki, müasir beynəlxalq hüququn doktrinası dövlətlərin müdafiə hüququndan, eyni zamanda kollektiv müdafiə hüququndan təkcə öz ölkəsinin sərhədləri çərçivəsində deyil, eyni zamanda kənarda da müvafiq addımlar atmağa imkan yaradır:

"Bu gün reallıq ondan ibarətdir ki, təcavüz və hərbi təhdid amili varsa o zaman bu və ya digər ölkə önləyici addımlar ata bilər. Eləcə də Azərbaycan Ermənistanın gələcək də yarda biləcək hərbi təhdidlərin qarşısını almaq üçün önləyici addımlar ata bilər. Yəni Ermənistan ərazisində mövcud olan və gələcək Azərbaycan üçün təhlükə yarada biləcək istənilən hərbi obyekt legitim hədəfə çevrilə bilər. Dünyada bununla bağlı çox saylı praktikanın olduğunu şahidi olmuşuq. Bu aspektdən yanaşılanda Ermənistan və Fransa arasındakı əməkdaşlığın inkişafı və perspektivi ona uyğun addımlar atılmasını zəruri edə bilər".

Telegramda izləyin