"Makron hökuməti erməni rolunda çıxış etməklə beynəlxalq müstəvidə anti-Azərbaycan kampaniyası həyata keçirir" - DEPUTAT

"Ermənistanın sürətlə silahlanması və Azərbaycana qarşı növbəti müharibəyə hazırlaşması Cənubi Qafqazda sülh və sabitliyə ciddi təhdid yaradır".

Bunu Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib.

Deputat qeyd edib ki, rəsmi İrəvan və Paris arasında 2025-ci ili əhatə edəcək müdafiə sahəsində əməkdaşlıq proqramının imzalanması Fransanın regionla bağlı geopolitik maraqlarına xidmət edən təxribatçı plandır:

"Artıq heç kimə sirr deyil ki, Makron hökuməti Ermənistandan daha çox erməni rolunda çıxış etməklə beynəlxalq müstəvidə anti-Azərbaycan kampaniyası həyata keçirir. Yelisey Sarayı qərəzli siyasi ritorikadan əlavə, həm də Ermənistanın silahlandırılması istiqamətində ciddi addımlar atır və Hindistan, Yunanıstan kimi ölkələri də prosesin bir parçası edir. İkinci Qarabağ Müharibəsindən sonra Ermənistan Fransadan müdafiə məqsədi adı altında hücum silahları əldə edib və bu proses davam etdirilir. Məqsəd regional sabitliyi pozmaq və hərbi balansı dəyişdirməkdir".

Deputat vurğulayıb ki, Fransanın məkirli planları heç şübhəsiz olaraq Nikol Paşinyanın da maraqları ilə uzlaşır:

"Ermənistan rəhbərliyinin revanşist siyasəti, silahlanma tendensiyası və göstərilən dəstək fonunda həyata keçirdiyi avantürist bölgədə yeni münaqişə ocağını yaratmaq niyyətini açıq şəkildə biruzə verir. Paşinyan erməni cəmiyyətində zəifləyən nüfuzunu yeni hərbi kompaniya ilə canlandırmaq istəyir. Lakin bütün bunlar birmənalı şəkildə Ermənistanın zərərinə olacaq siyasi ritorikadır. Azərbaycan bütün parametrlər üzrə Cənubi Qafqazın lider dövləti olduğu üçün hərbi və siyasi güc məhz ölkəmizin lehinədir. İrəvanın hər hansı bir hərbi qarşıdurmada gücümüz qarşısında tab gətirməsi reallıqdan uzaqdır".

Telegramda izləyin