"Vətən müharibəsindən 4 il vaxt keçsə də Ermənistan hələ də Azərbaycana minalanmış ərazilərin düzgün xəritəsini verməyib" - DEPUTAT

"Ermənistanın Minalanmış Ərazilərin Xəritəsini hələ təqdim etməməsi işğaldan azad olunmuş torpağlarda quruculuq işlərinin gecikməsinə və soydaşlarımızın yurdlarına qayıdışını gecikdirir".

Bunu Sonxeber.az-a danışan deputat Şahin Seyidzadə bildirib

Deputat qeyd edib ki, 2020-ci ilin noyabr ayında başa çatan İkinci Qarabağ müharibəsindən sonra 4 ildən çox vaxt keçməsinə baxmayaraq Ermənistan hələ də Azərbaycan tərəfinə müharibə zamanı minalanmış ərazilərin düzgün xəritəsini təqdim etməyib

"Bu vəziyyət, müharibə zamanı minaya düşən soydaşlarımızın həyatını təhlükə altına almağa və onların doğma yurdlarına qayıtmasını ciddi şəkildə gecikdirməyə davam edir. Minalanmış ərazilərin xəritələrinin təqdim edilməsi, yalnız keçmiş döyüş xətləri ilə əlaqəli deyil, həm də müharibə nəticəsində həyatını itirən və yaralanan insanların xatirəsinə hörmətin göstəricisidir. Ən əsas məsələ isə budur ki, bu xəritələr, həm də soydaşlarımızın ərazilərə geri dönməsi və orada həyatlarını bərpa etməsi üçün həyati əhəmiyyət kəsb edir".

Deputat vurğulayıb ki, Azərbaycan, müharibədən sonra ərazilərini bərpa etmək, öz vətəndaşlarını geri qaytarmaq və orada təhlükəsiz yaşam şəraiti yaratmaq məqsədilə minadan təmizləmə əməliyyatları həyata keçirir:

"Lakin, Ermənistanın bu xəritələri təqdim etməməsi, bu prosesin əhəmiyyətli dərəcədə yavaşlamasına səbəb olur. Təkcə minaya düşən insanların həyatı deyil, həm də iqtisadi inkişaf, infrastrukturun bərpası və həmin ərazilərdəki ekoloji vəziyyət də bu gecikmələrdən təsirlənir.

Ermənistanın bu məsələni hələ də gecikdirməsi, beynəlxalq ictimaiyyətin və humanitar təşkilatların diqqətini cəlb etməli və təzyiqləri artırmalıdır. Azərbaycanın vətəndaşlarının öz doğma torpaqlarına təhlükəsiz şəkildə dönə bilməsi üçün, bu xəritələrin təqdim edilməsi təkcə hüquqi deyil, həm də insan haqları baxımından böyük əhəmiyyət daşıyır.

Qarabağda həyatın bərpası, minalardan təmizlənmiş ərazilər və təhlükəsiz yaşayış şəraitinin təmin edilməsi, yalnız xəritələrin düzgün və tam təqdim edilməsindən sonra mümkündür. Soydaşlarımızın öz doğma yurdlarına qayıtması və orada yenidən həyat qurması üçün Ermənistanın üzərinə düşən məsuliyyəti yerinə yetirməsi vacibdir".

Telegramda izləyin