"Makron Azərbaycanın qlobal miqyasda artan nüfuzunu ölkəsi üçün təhdid olaraq qiymətləndirir" - DEPUTAT

"Rossiya Seqodnya Beynəlxalq İnformasiya Agentliyinə müsahibə verən cənab Prezident İlham Əliyev Fransanın müstəmləkə siyasəti ilə bağlı bir sıra mühüm fikirlər səsləndirdi. Ölkə rəhbərimiz rəsmi Parisin Korsika, Yeni Kaledoniya, Mayot adası və bu tip 15 ölkədə beynəlxalq hüquqa və insan haqlarına zidd yanaşmalarını sərt şəkildə tənqid etdi".

Bunu Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib.

Deputat qeyd edib ki, Fransanın qaranlıq tarixinin böyük bir hissəsi müstəmləkəçilik siyasəti ilə bağlıdır:

"Yelisey Sarayı müstəmləkələrində, xüsusilə, Afrika və Asiya ölkələrində yerli xalqların hüquqlarını sistematik formada pozmuş, resursları istismar etmiş, fransız dili və mədəniyyətini zorla tətbiq edərək yerli mədəniyyətləri inkar etmişdir. Fransanın Əlcəzairdə, Malidə, Nigerdə törətdiyi qətliamlar insanlıq adına ləkədir.

Azərbaycan Qoşulmama Hərəkatı və Bakı Beynəlxalq Təşəbbüs qrupu vasitəsilə Parisin neokolinalist siyasətinə qarşı fəal şəkildə mübarizə aparır. Ölkəmiz fransız zülmündən əziyyət çəkən xalqların beynəlxalq arenada səsi olmuşdur. Xüsusilə, dövlət rəhbərimiz İlham Əliyevin neokolinalizim yanaşmalarına yönəlik sərt mövqeyi Fransanın qlobal miqyasda nüfuzuna ciddi xələl gətirir. Ardıcıl və məqsədyönlü şəkildə həyata keçirilən işlər artıq öz müsbət nəticələrini verməkdədir. Fransa hal-hazırda əsrlərdir söz sahibi olduğu Afrikada istənilməyən qonaq kimidir və bir çox dövlətlər Mali, Mərkəzi Afrika Respublikası, Niger, Burkina Faso fransız hərbi kontingentlərini ölkələrindən qovurlar.

Fransa prezidenti Emanuel Makron Azərbaycanın qlobal miqyasda artan nüfuzunu ölkəsi üçün təhdid olaraq qiymətləndirir. O, Ermənistanı silahlandırmaqla, növbəti hərbi qarşıdurma yaratmağa cəhdlə ölkəmizi zəiflətməyə çalışır. Lakin onun addımları heç bir nəticə verməyəcək. Azərbaycan regionun lider dövləti kimi siyasi və hərbi proseslərə nəzarət edir, qardaş Türkiyə ilə müttəfiqlik münasibətləri fonunda regional təhlükəsizlik arxitekturası formalaşdırır".

Telegramda izləyin