VALİDEYİNLƏRİN NƏZƏRİNƏ! "Cizgi filmləri uşaqları manipulyasiya edir" - PSİXOLOQ

Sosial mediada valideyinlər tez-tez cizgi filmlərində yayımlanan qeyri-etik görüntülərdən, müharibə səhnələrindən şikayət edir.

Bəs görəsən cizgi filmlərində bu kimi səhnələrin yayımlanması uşaq psixologiyasına necə təsir edir?

Mövzu ilə bağlı psixoloq Gülnar Orucova Sonxeber.az – a açıqlama verib:

"Ümumiyyətlə, cizgi filminə uşaqlar müəyyən yaş dövründə və müəyyən zaman kəsimlərində baxmalıdırlar. Əsasən 2 yaş yarımdan sonra gün ərzində 2 dəfə 20 dəqiqədən çox olmamaqla baxmaq daha məsləhətlidir. Amma bizim valideyinlər saatlarla uşağı cizgi filminin qarşısında saxlayır. Bəzən də sual verilir ki, uşaqlar niyə cizgi filmini bu qədər sevir? Çünki, cizgi filmlərinin kadrları 3 saniyədən bir rəngarəng şəkildə dəyişir. Bu kadrlar da uşaqlara çox maraqlı gəlir.

Cizgi filmləri uşaqları manipulyasiya edir. Bu birtərəfli ünsiyyətdir və çox izləyən uşaqların nitqi inkişaf etmir. Son dönəmlər görürük ki, cizgi filmləri formatını dəyişib. Xəyali obrazların sayı çoxalıb və uşaqlar onları reallıqla ayırd etməkdə çətinlik çəkir. Hətta özünü hörümçək adama bənzədib yüksəklikdən atan uşaqlar da olub. Ümumiyyətlə, uşaq 6 yaşa qədər gördüyü hərşeyi beyninə yazır. Bəzən valideyinlər uşaqlarının yanında mübahisə edir. Bu onlarda travma olaraq qalır və böyüyəndə öz ailələrinə də gördüklərini tətbiq edirlər. Eynən bu, uşaq vaxtı izlədikləri cizgi filmlərinə də aiddir. Orda gördükləri dava, müharibə səhnələri birbaşa psixologiyalarına təsir edir. Davranış pozulur, əsəbi və gərgin olur, hərəkətlərini idarə etməkdə çətinlik çəkir, dərslərə adaptasiya ola bilmir. Bundan başqa, cizgi filmində qeyri-etik səhnələri görüb onları təkrar etmək istəyə bilərlər. Buna görə valideyin özü də cizgi filminə baxmalıdır ki, uşağına nəzarət edə bilsin".

Çiçək Sadatova

Telegramda izləyin