"Həqiqətdən uzaq bu qətnamənin qəbulu Avropa Parlamenti və Azərbaycan arasında münasibətlərin inkişafına xələl gətirir" - DEPUTAT

Avropa Parlamenti tərəfindən Azərbaycan əlehinə qərəzli qətnamənin qəbul edilməsi növbəti ikili standartların nümunəsidir. Həqiqətlərdən uzaq, tamamilə qarayaxma məqsədi daşıyan qərarın qəbulu Avropa Parlamenti və Azərbaycan arasında münasibətlərin inkişafına xələl gətirməklə, qəbuledilməz yanaşma sərgilənir.

Azərbaycan Cənubi Qafqazın siyasi- iqtisadi müstəqilliyi güclənmiş ən sabit və qüdrətli dövlətidir. Ölkəmizin beynəlxalq və regional proseslərə çox aydın baxışı və təsəvvürü mövcuddur. Cənab Prezident İlham Əliyevin uğurlu dövlət siyasəti Azərbaycanın qlobal müstəvidə qazandığı nəaliyyətlərin birbaşa göstəricisidir.

Təsadüfi deyil ki, ölkəmizin nüfuzu artıqca bizə qarşı qərəzli və riyakar kampaniyaların miqyasında genişlənmə müşahidə olunur. Avropa Parlamentinin məlum qətnaməsi də məhz eyni səbəblərdən qaynaqlanır.

Çox təəssüf hissi ilə qeyd edirəm ki, dünyanın aparıcı siyasi təşkilatlarından biri olan Avropa Parlamenti bir qrup erməni və fransızın əsirinə çevrilib. Fransa regional maraqlarını təmin etmək məqsədi ilə Avropanın aparıcı beyin mərkəzlərindən siyasi alət kimi istifadə edir.

Həqiqətən maraqlı bir situasiya formalaşıb. Azərbaycan əlehinə danışan, əsassız fikirlər səsləndirən dövlətlər digər tərəfdə bizimlə enerji təhlükəsizliyi istiqamətində əməkdaşlığa can atır. Bu tamamilə ikiüzlü yanaşmadır.
Heç kimə sirr deyil ki, Azərbaycan qoca qitənin enerji təhlükəsizliyində vacib rol oynayır. Respublikamızın enerji resursları İttifaq dövlətlərinin diqqət mərkəzindədir. Ancaq bu cür mövqe nümayiş etdirilməsi Avropa üçün Azərbaycan kimi etibarlı bir tərəfdaşı itirməklə nəticələnə bilər.

Günay Ağamalı

Milli Məclisin deputatı, Ana Vətən Partiyasının sədr müavini

Telegramda izləyin