"Azərbaycanın D-8 üzvlüyü İslam həmrəyliyinin möhkəmlənməsində və islamofobiya ilə mübarizə sahəsində böyük töhfə olacaq" - Bəhruz Quliyev

"Azərbaycan dekabrın 19-da Misirin paytaxtı Qahirədə İnkişaf etməkdə olan səkkiz İslam ölkəsinin birləşdiyi İqtisadi Əməkdaşlıq Təşkilatının (D-8) XI Sammiti zamanı yekdilliklə Azərbaycan Respublikası yekdilliklə D-8 təşkilatının üzvü seçilib.

Bunu Sonxeber.az-a danışan SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev deyib.

Bəhruz Quliyev qeyd edib ki, bu təşkilatın təməli 1996-cı ildə Türkiyənin təşəbbüsü ilə İstanbulda Banqladeş, İndoneziya, İran, Malayziya, Misir, Nigeriya və Pakistanın əməkdaşlığı ilə təşkil edilən İnkişaf Əməkdaşlıq Konfransında qoyulub:

"Bir il sonra isə 1997-ci il iyunun 15-də İstanbulda 8 ölkənin dövlət və hökumət başçılarının sammitində təşkilat rəsmən elan olunub. Təxminən 28 il əvvəl yaradılan təşkilat indiyə kimi heç vaxt yeni üzv qəbul etməyib. Yəni, ilk dəfə olaraq Azərbaycan D-8-in üzvü kimi qəbul edilib və bu təşkilat genişlənib. O deməkdir ki, Azərbaycanın regionda və beynəlxalq müstəvidə yaratdığı yeni reallıqlar nəzərə alınır və həm də ölkəmiz qüdrətli aktor kimi qəbul edilir.

Ümumiyyətlə D-8 çərçivədə həmçinin regionda və dünyada gedən proseslər fonunda təhlükəsizliyin, sabitliyin, rifahın və qarşılıqlı faydalı əməkdaşlığın formalaşması, eləcə də iqtisadi və ticarət, nəqliyyat, kommunikasiya və bir sıra digər vacib istiqamətlərdə əlaqələrin inkişaf etdirilməsi mühüm əhəmiyyət kəsb edir.

Hesab edirəm ki, Şərq ilə Qərb arasında körpü rolu oynamış, İslam dünyasının əsas mədəni, dini və sivilizasiya mərkəzlərindən biri olan Azərbaycanın D-8 üzvlüyü eyni zamanda, İslam həmrəyliyinin möhkəmlənməsində, İslam dəyərlərinin dünyada təbliğində və islamofobiya ilə mübarizə sahəsində böyük töhfə olacaq. Bu Azərbaycan və bu təşkilat üçün uğurlu əməkdaşlıqdır".

Telegramda izləyin