"Prezident İlham Əliyevin həyata keçirdiyi müdrik xarici siyasət sayəsində regionumuzda sabitlik bərpa olunub" - DEPUTAT

Bu gün Azərbaycana Heydər Əliyev yolunun layiqli davamçısı İlham Əliyev başçılıq edir. Heydər Əliyev siyasəti Azərbaycanda yaşayır və qalib gəlir. Azərbaycan prezidenti İlham Əliyev bütün fəaliyyəti boyu xalqının iradəsini ifadə edən, dünya tərəfindən qəbul olunan görkəmli və müasir dövlət xadimidir. Cənab Prezident təkcə Azərbaycanda böyük hörmətə və nüfuza malik deyil, Azərbaycan prezidentinin siyasi portreti bütün dünyada məşhurdur.

İlham Əliyev Milli Məclisin deputatı olduğu dövrdə də geniş və çoxşaxəli fəaliyyət göstərmişdi. O, daim xalqın içərisində olmuş, onun problemlərini öyrənmiş, əhalinin sosial müdafiəyə ehtiyacı olan təbəqələrinə müntəzəm qayğı göstərmişdi.

Milli Məclisin Beynəlxalq münasibətlər və parlamentlərarası əlaqələr daimi komissiyasının üzvü olmuş İlham Əliyevin Avropa Şurasının Parlament Assambleyasında Azərbaycan Parlamenti daimi nümayəndə heyətinin rəhbəri kimi fəaliyyəti doğma xalqa qətiyyətlə və cəsarətlə xidmət etməsinin nümunəsidir. Onun AŞPA-dakı məqsədyönlü, qətiyyətli və cəsarətli çıxışları Azərbaycanın Avropa məkanında nüfuzunun daha da artmasına güclü təsir göstərmişdir. Məhz İlham Əliyevin yorulmaz fəaliyyəti, qətiyyətli çıxışları sayəsində erməni təcavüzkarları Avropa Şurasında ifşa olunmuş, Azərbaycanın ayrılmaz parçası olan Dağlıq Qarabağ haqqında, qondarma "Dağlıq Qarabağ problemi" barədə Qərb dünyasında obyektiv rəy formalaşmış, həmin münaqişəyə düzgün siyasi qiymət verilmiş, onun həlli yolunda mühüm qərarlar verilmişdi.

Xüsusilə Azərbaycanın beynəlxalq yarışlarda, idmanın müxtəlif sahələrində ön mövqelərə çıxması, Bakının dünya üzrə mühüm beynəlxalq yarışların keçirildiyi mərkəzə çevrilməsi Azərbaycanın şöhrətini daha da artırır, onun beynəlxalq nüfuzuna müsbət təsir göstərir. Bu, İlham Əliyevin gənclər siyasətinin ən böyük uğurlarından biridir. O, sürətlə dəyişən çağdaş dünyada, qloballaşma və inteqrasiya proseslərində, bütün beynəlxalq görüşlərdə və apardığı yüksək səviyyəli danışıqlarda Azərbaycanın mənafelərini bütün sahələrdə uğurla müdafiə edir. İlham Əliyevin uğurlu xarici siyasəti sayəsində Azərbaycanın beynəlxalq və regional problemlərin həllində də rolu və nüfuzu getdikcə artır.

Prezident İlham Əliyevin həyata keçirdiyi müdrik islahatlar və uzaqgörən, məqsədyönlü xarici siyasət sayəsində, bir çox böyük dünya dövlətlərinin maraqları toqquşan regionumuzda sabitlik mövcuddur. Məhz bu hegemon dövlətlərin maraqlarının üst üstə düşdüyü digər bölgələrə nəzər salsaq, bunun nə qədər əhəmiyyətli və həyati zərurət daşıdığını görərik. Mən əminliklə deyə bilərəm ki, əgər bu gün Avropada müharibə nəticəsində sivil insanlar həyatını itirir, kütləvi məzarlıqda dəfn olunursa, demək Azərbaycan rəhbəri İlham Əliyevin Cənubi Qafqazın sabitliyi üçün fəaliyyəti məhz insanlıq naminə görülən işlərdən ən yüksək mükafata layiq görülməlidir.

Müşfiq Cəfərov

Milli Məclisin deputatı

Telegramda izləyin