Assosiasiya: Gələn il qızılın 1 unsiyası 3 000 dollara qədər bahalaşa bilər

2025-ci ildə dünya bazarında qızılın 1 unsiyasının qiyməti 3 000 ABŞ dollarına qədər arta bilər.

Bunu "Report"a açıqlamasında "Azərbaycan Zərgərlər Assosiasiyası" İctimai Birliyinin İdarə Heyətinin sədr müavini, "Qiymətli metallar və qiymətli daşlar" üzrə Texniki Komitənin sədri Rövşən Əmircanov bildirib.

"Gələn il qlobal iqtisadi və geosiyasi amillərin təsiri ilə qızıl və gümüş qiymətlərində artımın davam edəcəyi ehtimal olunur. Hazırkı siyasi gərginliklərin yaxın zamanda azalacağına dair ciddi əsasların olmaması bu proqnozu dəstəkləyir. Regional münaqişələr və beynəlxalq münasibətlərdəki qeyri-sabitlik qızıla olan tələbatı artırır. Xüsusilə Yaxın Şərqdə baş verən hərbi toqquşmalar və siyasi gərginliklər qlobal bazarlara ciddi təsir edir. Bu bölgədə hərbi eskalasiya risklərinin artması nəticəsində investorlar təhlükəsiz aktivlərə, o cümlədən qızıla üstünlük verməkdə davam edirlər. Nəticədə 2025-ci ildə qızılın 2 500-3 000 ABŞ dolları diapazonunda ticarət olunması gözlənilir", - deyə o qeyd edib.

Ekspert əlavə edib ki, beynəlxalq maliyyə institutlarının proqnozlarına görə, 2025-ci ildə dünya iqtisadiyyatında tənəzzül riski yüksək olaraq qalacaq: "Yüksək inflyasiya, mərkəzi bankların sərt pul siyasətləri və artan borclanma xərcləri iqtisadi aktivliyi zəiflədə bilər. Bu vəziyyət fonunda qızıla maraq artır, çünki investorlar iqtisadi qeyri-müəyyənlik şəraitində etibarlı alətlər axtarır".

Onun sözlərinə görə, hazırda əmtəə birjalarında qızılın 1 unsiyasının qiyməti 2 630-2 640 ABŞ dolları arasında dəyişir: "Azərbaycanın daxili bazarında isə qızılın qiymətləri əyarına görə müəyyən edilir. Belə ki, 585 əyar qızılın 1 qramı 50 ABŞ dolları, 750 əyar qızılın 1 qramı 64 ABŞ dolları, 999,9 əyar qızılın 1 qramı isə 85 ABŞ dolları təşkil edir. Yerli bazarda qızıl məmulatlarının satış qiymətləri bir sıra amillərdən, o cümlədən məmulatın əyarından, istehsal prosesində tətbiq olunan işçilik səviyyəsindən, istehsal ölkəsindən və aid olduğu brenddən asılı olaraq dəyişir. 585 əyarlı qızıl məmulatlarının satış qiyməti 100-115 manat, 750 əyarlı qızıl məmulatlarının qiyməti 130-150 manat, 999 əyarlı qızıl məmulatlarının qiyməti isə 160-180 manat arasında dəyişir. Gümüşün dünya birjasında 1 unsiyasının qiyməti 29,7-30 ABŞ dollarıdır. Azərbaycanın daxili bazarında satışda olan 925 əyarlı gümüşün qiyməti isə işçiliyindən asılı olaraq 3-8 manat arasında dəyişir".

Bundan başqa, sədr müavini deyib ki, platin və palladium hazırda qlobal qiymətli metal bazarlarında əhəmiyyətli yer tutur, qiymətləri müxtəlif iqtisadi və sənaye maillərdən asılı olaraq dəyişir: "Dünya bazarında platinin 1 unsiyası təxminən 930-950 ABŞ dollarıdır. Bu metal əyarlara görə qiymətləndirilir və əsasən sənaye məqsədləri ilə yanaşı, məhdud miqdarda zərgərlik sahəsində də istifadə olunur. Platin kifayət qədər sərt olduğu üçün zərgərlikdə işlənməsi çətinlik yaradır. Əsas tətbiq sahəsi isə avtomobil sənayesidir, burada katalizator istehsalı üçün geniş istifadə edilir. Bu da onun qiymətinin sənaye tələbatından birbaşa asılı olduğunu göstərir".

"Palladium isə dünya bazarında daha yüksək qiymətlərlə ticarət olunur və onun 1 unsiyasının qiyməti 900-950 ABŞ dolları arasında dəyişir. Azərbaycanda palladium məhsullarının ticarəti məhdud olsa da, qiymətləri qlobal bazarlardakı tendensiyalara uyğun müəyyənləşdirilir. Palladium əsasən elektronika və tibbi avadanlıqların istehsalında mühüm rol oynayır, bu da onun sənaye sahəsində əhəmiyyətini artırır", - deyə Assosiasiya rəsmisi əlavə edib.

Telegramda izləyin