"İranın bu səviyyəyə çatmasında, Ameli kimi arxaik təfəkkürlü din dəllallarının rolu böyükdür" - DEPUTAT

Xəbər verdiyimiz kimi 29 dekabr 2024-cü il tarixində Ərdəbildə İranın Ali rəhbərinin Ərdəbil vilayəti üzrə nümayəndəsi, Ərdəbilin imam cüməsi Seyid Həsən Amelinin iştirak etdiyi və İranın Radio və Televiziya Təşkilatının "Xəbər Şəbəkəsi" kanalında yayımlanan tədbirdə Azərbaycana və dövlət başçımıza qarşı səsləndirilən təhqiramiz ifadələr səsləndirib.

Bununla yanaşı, həm də son zamanlar İranda əhali arasında açıq-aşkar şəkildə anti-Azərbaycan əhvali-ruhiyyəsi ciddi şəkildə qızışdırılır.

Bununla bağlı Sonxeber.az-a danışan deputat Nəsib Məhəməliyev bildirib ki, Ameli İranın dini rəhbəri Xamaneinin Ərdəbil üzrə nümayəndəsidir:

"Bu o deməkdir ki, İranın müstəqil Azərbaycana yönəlik, uzun illər ərzində formalaşmış siyasəti davam edir və heç bir dəyişiklik baş verməmişdir. İranın Livanda, İraqda, Suriyada, Yəməndə apardığı siyasətin iflasa uğramasına baxmayaraq, geri zəkalı molla rejimi əqidəsini dəyişmir. Cəmi bir il ərzində, həmin ölkələrdə yetişdirdiyi və maliyyələşdirdiyi proksi qüvvələri darmadağın edildi. İsrail tərəfindən hərbi obyektlərinin vurulmasına, yüksək rütbəli hərbçilərinin, nüvə silahı üzərində çalışan alimlərinin, dövlət adamlarının Tehranın mərkəzində qətlə yetirilməsinə, karikatura tipli, razılaşdırılmış cavabları İranın beynəlxalq nüfuzunu heçə endirdi. İranın qüdrəti, hərbi gücü barədə, Amelinin və onun kimi nağılbazların apardığı təbliğat sabun köpüyü kimi əridi. Miflər dağıldı. Hesab edirəm ki, İran-molla diplomatiyasını normal siyasətdən fərqləndirən əsas cəhət, reallıqla uzlaşmayan ideologiyanın kor-təbii əsirinə çevrilmələridir. Nəticə isə, göz qabağındadır. Geniş coğrafi imkanlara, təbii resurslara, gənc, enerjili insan kapitalına rəğmən, böyük bir dövlət dilənçi, beynəlxalq aləmdən təcrid olunmuş vəziyyətdədir".

Deputat qeyd edib ki, İranın bu səviyyəyə çatmasında, Ameli kimi arxaik təfəkkürlü, din dəllallarının rolu böyükdür:

"Onun anti-Azərbaycan isterikasının kökündə, sivil, müasir dövlət quruculuğumuz, günü-gündən güclənməyimiz, inkişafımız durur. Ameliyə işıqlı, savadlı, müasir, dünyaya açıq, rəqabət qabiliyyətli gənclər yox, saatlarla məscidlərdə nağıllara qulaq asan, kütlə lazımdır. Həmin zat, Güney Azərbaycanda milli kimliyini dərk edən gəncliyi özü üçün, təmsil olunduğu rejim üçün ən böyük təhlükə olaraq görür. Mollaları qorxudan, məhz budur. Ona görə də, var gücü ilə milli şüurun oyanmasını əngəlləyən, dini təbliğatla məşğul olurlar.

Amelinin yuxusuna haram qatan digər səbəb isə, Güneyli soydaşlarımız arasında, Müzəffər Ali Baş Komandan İlham Əliyevin nüfuzu, kütləvi mitinqlərdə, tədbirlərdə Azərbaycan ölkə başçısının portretlərini qaldırmalarıdır. Bu fakt, fars rejimini ciddi narahat edir. Bunun qarşısının alınması üçün Güneyli və Quzeyli soydaşlarımız arasında ədavət qızışdırılır
Allah qəni-qəni Mirzə Fətəli Axundova, Mirzə Cəlilə, Sabirə, Zərdabiyə, Üzeyir bəyə rəhmət eləsin. Azərbaycan insanı yaxşı başa düşür ki, 21-ci əsrdə, heyvanların bioloji tullantılarından gümüş istehsal edən "molla İbrahimxəlil tipli kimyagərlərlə ", ölü dirildən "Şeyx nəsrullahlarla" yol getmək ölümə bərabərdir. Əsr, İnformasiya kommunikasiya texnologiyaları əsridir. Nağıllar işləmir".

Deputat vurğulayıb ki, son illər, xüsusilə 44 günlük müharibədən sonra mollaların maskası cırıldı:

"Xalq düşmənini, dostunu tanıdı. Hər kəs bilir ki, Sovetlər İttifaqı dağılandan sonra, İran dövlətinin Cənubi Qafqaz ölkələrinə yönəlik düşünülmüş, planlaşdırılmış xarici siyasəti olmuşdur. Azərbaycan gəncləri bu ölkənin dini məktəblərində təhsil almalı, nisbətən perspektivlər maddi maraq qarşısında xüsusi xidmət orqanları ilə əməkdaşlığa cəlb olunmalı, məscidlərdə və mədrəsələrdə, əhali arasında təbliğat aparmalıdırlar. 30 ildən artıq bir müddətdə, ölkəmizdə bu siyasətə başçılıq edən şəxs, rəhbərin burdakı nümayəndəsi, SEPAH zabiti Ocaqnicat olmuşdur. Əfsuslar olsun ki, bu gün zərərli ideologiyanın təsiri altına düşən xeyli sayda insanımız var.

Azərbaycandan fərqli olaraq, Ermənistanla münasibətlər sosial, ticari, iqtisadi, siyasi, təhlükəsizlik maraqları üzərində qurulmuşdur. Ermənistan prezidentlərinin etiraf etdikləri kimi, "əgər İranın dəstəyi olmasaydı, Ermənistan da olmazdı".
İran bizimlə molla, narkotik ixrac etməklə, Ermənistanla iqtisadi layihələrin icrası ilə məşğul olmuşdur.
Biz demokratik cəmiyyətdə yaşayırıq. Hər bir insan istədiyi ölkəyə simpatiya və yaxud antipatiya hissləri bəsləyə bilər. Ancaq, hər birimiz, hər şeydən əvvəl dövlətimizin bütövlüyünə, sabitliyinə xələl gətirən amilləri dəf etməliyik. Heç bir ideologiya, siyasi-dini baxışlar,milli birliyimizi sarsıtmamalıdır. Ameli kimi avantüristlər həmişə olub, gələcəkdə də olacaq. Biz cavab verməyi bacarmalıyıq".

Telegramda izləyin