Ağ qızdırma nədir və necə müalicə olunur...

"Ağ qızdırma zamanı uşağın rəngi solğun olur. Qulaqları, əlləri, ayaqları soyuq olur. Hətta dodaqları soyuq və göyərmiş kimi olur, amma termometr 39 dərəcə göstərə bilir. Uşaq halsız, qeyri-adekvat olur, titrədir".

Ölkə.Az xəbər verir ki, bunu pediatr Aytən İsmayılzadə deyib. O bildirib ki, bunun səbəbi damarlardakı spazmdır:

"Damarlar sıxılırkən hərarətin ətrafa verilməsi çətinləşir. Uşaq üşüdüyü üçün onun üstünü qalın örtmək istəyi normaldır, amma lazım deyil. Çünki hərarət bir az da yüksələ bilər. Uşaqda ağ qızdırma olduqda damar spazmını götürmək üçün "no-şpa" veririk. 3 yaşa kimi "no-şpa" əvəzinə "spaskupreel" şam istifadə etmək olar. Əvvəl hərarətsalıcı, 5-10 dəq sonra isə "spaskupreel" şamı qoymaq olar.

Dərmandan öncə isə uşağın bədənini ilıq su ilə dəri qızarana qədər sürtərək silmək lazımdır. Dəri qızarmağı damarların genişlənməsindən xəbər verir və bundan sonra hərarət daha sürətlə düşməyə başlayacaq. Bir az böyük yaşlı uşağın ayaqlarını ilıq vannada saxlamaq olar".

Mütəxəssis dərmanların dozasını da qeyd edib:

"No-şpa" isə iki dozada olur 40 və 80 mg.
2-5 yaş üçün 20 mg gündə 3 dəfə ( yəni 40 mq olanın yarısı, 80 mq olanın isə dörddə biri), 6 yaşdan yuxarı 40 mg 3 dəfə (yəni bütöv 40 mq bə ya yarı 80 mq olandan).
Həb şəklində qəbul etməyən uşaqlara "no-şpa" inyeksiya (iynə) şəklində əzələ daxilinə tətbiq oluna bilər. Bunu artıq həkim təyinatı ilə edəcəksiniz. "Spaskuprelin" tabletini də "no-şpa" ilə yanaşı və ya tək halda istifadə etmək olar.
2 saat ərzində hər 15 dəqiqədən bir olmaqla 1 həb sormaq lazımdır. Ağ qızdırma zamanı uşağın titrəməsi, göyərməsi qıcolma demək deyil. Huşu yerində olur ancaq reaksiyası ləng ola bilər. Qırmızı qızdırmada isə uşaq "yanır", pörtür, kefi də çox vaxt yaxşı olur, yenə də su ilə silirik, amma əlavə olaraq sürtmürük, bir az da qızartmırıq. Vanna suyunun hərarətini ağ qızdırmada olandan bir az da aşağı edirik. Ağ qızdırma adətən virus infeksiyasının ilk günlərində olur. Virus toksinin yüksək miqdarı və bu toksinlərin damardaraldıcı mərkəzə təsiri ilə əlaqəli olur. Ağ qızdırma zamanı febril qıcolma riski də yüksək olur. Qıcolmaya meyilli və epilepsiyası olan uşaqları diqqətdə saxlamaq lazımdır".

Telegramda izləyin