'İnsanlar yas mərasimlərini toy məclislərinə çeviriblər" - AÇIQLAMA

Bu gün insanlar dünyadan köçən yaxınlarının xatirəsini əziz tutmaq üçün dəbdəbəli yas mərasimləri təşkil edir. Masalara xüsusi yeməklər, şirniyyatlar, növbənöv meyvə və çərəzlər düzülür. Qısaca, bu gün yaxınını itirən ölü sahibinin əsas dərdi yas mərasimini yüksək səviyyədə yola salmağın qayğısına qalsın.

Bəs görəsən yas mərasimlərinin dəbdəbəli keçirilməsinə həqiqətən də ehtiyac varmı?

Mövzu ilə bağlı sosioloq Lalə Mehralı Sonxeber.az - a açıqlama verib:

"Azərbaycanda lap əvvəllər yad evində qazan asıb yemək bişirilmə adəti olmayıb. Ümumiyyətlə, yas olan evdə ocaq tüstülənməzmiş. Bu ev sahibinin öhdəliyi olan bir iş deyildi. Uzaq yoldan gələn qonaqların qarşılanması da yaxın qonşuların hesabına həyata keçirilirdi. Yəni, yas evində yemək bişirilmirdi. Qohum və qonşular öz evlərində yemək bişirib həmin evə gətirirdilər. Sonradan yas evində halva bişirilmə adəti yarandı. Halva yas yeməyi kimi qəbul edildi. Halbuki, bu, şirniyyat növüdür. Sadəcə insanlara nəyisə təklif eləmək lazım idi. Onlar da ən asan və ucuz başa gələn şirniyyatı seçdilər. Uzun illər bu, belə davam etdi. İndi insanlar yas mərasimlərini toy məclislərinə çeviriblər. Hətta, yas mərasimlərini yola vermək üçün borca-xərcə, sələmə girən insanlar belə var. Uzun müddətli müzakirələrdən sonra bu hal yavaş-yavaş azaldıldı. İndi bəzi bölgələrdə artıq dəbdəbəli yas mərasimləri keçirilmir. Amma yenə də bu problem hələ tam həll edilməyib. Bu adəti yığışdırmaq lazımdır. Yas evində qonaqlıq olmaz. Bu, həm dünyasını dəyişən şəxsə, həm də onun ailəsinə də hörmətsizlikdir. O insanlar bilmir ki, öz yasını saxlasın, yoxsa gələn qonaqların yeməyini düşünsün. Hesab edirəm ki, bir stəkan çayla da ehsan məqbuldur. Dinə görə də bu belədir. Əgər yas sahibi ehsan məqsədi ilə xərc çəkmək istəyirsə, xərcləyəcəyi məbləği savab işlərə yönəldə bilər".

Çiçək Sadatova

Telegramda izləyin