"Qalatasaray"da Osimhen düyünü: "Napoli" yeni şərt irəli sürdü

"Qalatasaray" nigeriyalı hücumçu Viktor Osimhenin transferi üçün "Napoli" ilə danışıqları davam etdirir. Futbolçunun sarı-qırmızılı formanı geyinmək istəyi prosesi sürətləndirsə də, İtaliya təmsilçisi geri çəkilmir. Son danışıqlarda "Napoli" rəhbərliyi "Qalatasaray"a diqqətçəkən bir tələb irəli sürüb.

Oxu.Az-ın "Sabah"a istinadən verdiyi xəbərə görə, "Qalatasaray" bu transfer üçün ümumilikdə 75 milyon avroya qədər təklif irəli sürüb. Müqaviləyə əsasən, 40 milyon avro əvvəlcədən ödənilməlidir, qalan 35 milyon avro isə hissə-hissə ödəniləcək. Lakin "Napoli"nin prezidenti Aurelio De Laurentis bu təklifi rədd edərək, bank zəmanəti istəyib.

"Sarı-qırmızılar" bu şərtləri qəbul etməyə yaxınlaşdıqca, "Napoli" tərəfi təəccüblü bir müddəa ortaya atıb. Məlumata görə, İtaliya klubu Viktor Osimhenin müqaviləsinə onun 3 il A Seriyasına qayıtmayacağını nəzərdə tutan bənd daxil etmək istəyir.

Bu arada, İtaliya mətbuatının yazdığına görə, Osimhen "Napoli" rəhbərliyinə "Qalatasaray"da oynamaq istəyini açıq şəkildə çatdırıb və transferin asanlaşdırılmasını istəyib.

Hələlik tərəflər arasında qəti razılıq əldə olunmayıb. "Qalatasaray"ın adından prosesi idarə edən idarəçilərdən biri olan Abdullah Kavukçunun transferi yekunlaşdırmaq üçün tezliklə İtaliyaya dönərək "Napoli" ilə üz-üzə görüşməsi gözlənilir.

Telegramda izləyin