Enerjili qalmaq üçün hər həftə yeməli olduğunuz 10 qida

Düzgün karbohidrat seçimi həm sağlamlıq məqsədlərinə çatmaq, həm də orqanizmin enerji və qida maddələri ehtiyacını ödəmək üçün əsas amildir. Tövsiyə olunur ki, gündəlik kalorinin 45-65 faizi karbohidratlardan alınsın. Onların çatışmazlığı halsızlıq, həzm problemləri və hətta xoşagəlməz ağız qoxusu yarada bilər.

Qaynarinfo "Eatingwell" nəşrinə istinadən xəbər verir ki, mütəxəssislər həftəlik rasionda mütləq yer almalı 10 faydalı karbohidrat mənbəyini açıqlayıb:

Şirin kartof – orta ölçülü bir ədəd 150%-dən çox gündəlik A vitamini tələbatını ödəyir, göz, dəri və immun sisteminin sağlamlığı üçün vacibdir. Qabığı ilə birlikdə yeyilməsi lif qəbulunu artırır.

Süd – karbohidratla yanaşı, zülal, kalsium, maqnezium və sümüklər üçün vacib digər qida maddələri ilə zəngindir.

Qara lobya – bitki mənşəli zülal, lif və antioksidant mənbəyidir. Daha yaxşı qidalanma, az əlavə şəkər qəbulu və çəki nəzarəti ilə əlaqələndirilir.

Yulaf – prebiyotik liflərlə zəngin təbii karbohidrat mənbəyidir. Tərkibindəki beta-qlükan "pis" xolesterini azalda, ürək-damar xəstəlikləri riskini aşağı sala bilər.

Qara gavalı (qurusu) – yalnız qəbizlik üçün deyil, həm də sümük sağlamlığı üçün faydalıdır. Gündəlik 50 qram (təxminən 5 ədəd) menopauza sonrası qadınlarda sümük sıxlığının azalmasının qarşısını ala bilər.

Banan – gün ərzində enerjini qoruyur. Açıq-yaşıl qabıqlı bananlarda bağırsaq sağlamlığına müsbət təsir edən müqavimətli nişasta daha çox olur, tam yetişmiş banan isə lif və qida maddələri ilə zəngindir.

Alma – lif, C vitamini, mis və antioksidant kversetinlə zəngindir. Həm ürək, həm də beyin sağlamlığına faydalıdır, prebiyotik liflər bağırsaq mikroflorasını dəstəkləyir.

Farro – antioksidant, vitamin və mineral baxımından zəngin tam taxıldır. Qoz ləpəsini xatırladan dadı var, lif və zülalın birləşməsi uzunmüddətli enerji verir və toxluq hissini artırır.

Noxud – lif, antioksidant və bitki mənşəli zülal təmin edən qiymətli karbohidrat mənbəyidir.

Qəhvəyi düyü – zülal, lif, vitamin və minerallarla zəngindir. Yarım stəkan bişmiş qəhvəyi düyüdə təxminən 120 kalori, 2 qram lif, 3 qram zülal və 25 qram faydalı karbohidrat olur.

Bu məhsulların müntəzəm qəbulu enerji səviyyəsini yüksəldir, sağlam həzm sistemini dəstəkləyir və orqanizmin qida ehtiyaclarını qarşılayır.

Telegramda izləyin