"Hər şey demək olar ki, on dəqiqə ərzində baş verdi" - Yelena Sidorenko - VİDEOMÜSAHİBƏ

"Mən uşaqlıqdan rəqslə məşğul olmuşam və ANS televiziyasında keçirilən rəqs müsabiqəsində iştirak etmişəm. Televiziyaya aparıcı kimi dəvəti də elə həmin müsabiqə vasitəsilə almışam. Sadəcə, orada görmüşdülər ki, qeyri-azərbaycanlı bir qız Azərbaycan dilində danışır və s. Ümumiyyətlə, ağlımın ucundan belə keçməzdi ki, mən xəbər aparıcısı ola bilərəm. Düşünürdüm ki, bu, daha çox şou-biznes və ya hansısa əyləncəli verilişlərlə bağlı olacaq. Çünki ilk təhsilimi Azərbaycan Dövlət Mədəniyyət və İncəsənət Universitetində alırdım və tam əmin idim ki, bu sahə üzrə fəaliyyət göstərəcəm".

Bu sözləri Sonxeber.az-a müsahibəsində tanınmış teleaparıcı Yelena Sidorenko danışıb.

O, müsahibə əsnasında qeyd edib ki, ömrümdə heç vaxt xəbərlərə baxmamışdım, çünki ailəmiz rusdilli olduğu üçün heç kim Azərbaycan dilində xəbərlər izləmirdi:

"Hər şey demək olar ki, on dəqiqə ərzində baş verdi. O vaxt televiziyanın rəhbəri Vahid Mustafayev məni dəhlizdə gördü və nə işlə məşğul olduğumla maraqlandı. Mən də həmin vaxt orada təcrübə keçirdim və 17 yaşlı həvəsli bir qız kimi gördüyüm işlərdən danışırdım. Çox güman ki, Vahid müəllim məndə xəbər aparıcılığına dair bir potensial hiss etdi və söhbət əsnasında məni yavaş-yavaş xəbər studiyasına apardı.

Mən isə ömrümdə xəbərlərə baxmayan bir qız idim. Çünki ailəmiz rusdilli idi və heç kim Azərbaycan dilində olan xəbərləri izləmirdi. İlk dəfə idi ki, ANS-in studiyasında idim və pərdələr açıldı. Artıq orada olan hər kəs başa düşdü ki, bu, yeni aparıcıdır - bircə, məndən başqa. Məni oturtdular və dedilər: "Kameraya bax və orada nə görürsənsə, oxu". Qarşımda isə iqtisadiyyat xəbərləri idi.

Həmin an sözün əsl mənasında dilim dolaşmışdı, çünki oradakı sözləri tələffüz edə bilmirdim. (gülür) Sadəcə, tanışları ilə ünsiyyət qura biləcək qədər Azərbaycan dilini bilən, 8-ci mikrorayonda böyüyən, "yeddişüşə", "qaçdı-tutdu" oynayan bir qız idim. Amma birdən-birə iqtisadiyyat xəbərləri oxumaq, doğrusu, çox qəribə idi.

Geyimim də çox gülməli idi — çəhrayı rəngdə paltar, böyük sırğalar və s. Yəni, xəbər aparıcılığı ilə mənim heç bir uyğunluğum yox idi. Həmin anda Vahid müəllim də efir otağında iclas keçirirdi və hamı mənə baxıb qiymət verirdi: bu qız efirə yaraşırmı, ya yox. Nəticədə Vahid müəllim dedi: "İki həftə sonra efirdəsən". Mən nə qədər etiraz etdim, "yox" dedim, heç nə dəyişmədi". (gülür)

Müsahibənin tam versiyasını YouTube kanalımızda izləyə bilərsiniz:

Vüsalə İbrahimli

Telegramda izləyin