"Sumqayıt şəhəri 37 nömrəli tam orta məktəbdə qanunsuzluq iddiaları" - ŞİKAYƏT

Sumqayıt şəhəri 37 nömrəli tam orta məktəbdə "Pilot Layihə" çərçivəsində fəaliyyət göstərən idman müəllimi və eyni zamanda məktəbdə Həmkarlar İttifaqının sədri olan Quliyev Elgünlə bağlı ciddi iddialar gündəmə gəlib.

Sonxeber.az -a məlumat verən şikayətçilərin sözlərinə görə, o, maddi vəziyyəti zəif olan şəxslərin adından aidiyyatı qurumlara ərizə təqdim etdirərək, dörd nəfərin hesabına - hərəsinə 50 AZN olmaqla ümumilikdə 200 AZN vəsait köçürdüb. İddialara görə, həmin vəsait sonradan direktor müavini Zöhrə Qurbanova və məktəbin direktoru Elşad Eyvazov tərəfindən mənimsənilib.

Şikayətçilər bildirirlər ki, direktor Elşad Eyvazov məsələ ilə bağlı sorğu edildikdə, "hara müraciət edirsiniz edin, deyəcəyəm mənim xəbərim olmadan Elgün Quliyev bu işi görüb" sözləri ilə reaksiyasını bildirib.

Məlumatlara görə, təhsil naziri Emin Əmrullayev keçən il Elşad Eyvazovun direktor vəzifəsində fəaliyyətinə xitam verib. Buna baxmayaraq, o, 2025–2026-cı tədris ilində məktəbə "təşkilatçı" vəzifəsi adı altında geri qayıdıb. Yaşı 69 olduğu və vəzifəsinə rəsmi olaraq xitam verildiyi bildirilsə də, Elşad Eyvazovun hələ də direktor kabinetində oturduğu, gündəlik sənədlərdə öz adını möhürlə direktor kimi göstərdiyi iddia olunur.

Hazırda direktor əvəzi vəzifəsini direktor müavini Zöhrə Qurbanovanın icra etdiyi bildirilir. Şikayətçilər məktəbdə məhz Zöhrə Qurbanova ilə Elşad Eyvazovun birlikdə müxtəlif qanunsuz fəaliyyətlərə yol verdiyini iddia edirlər. Şikayətçilər mövcud vəziyyətə etiraz etdikləri üçün təhdid edildiklərini bildirirlər.

Telegramda izləyin