"Niyə göndəriş "Yeni klinika"ya verilir?"

ARB TV yayımlana "Günə doğru" proqramında "Yeni klinika"da növbə olması ilə bağlı süjet hazırlanıb.

Axşam.az xəbər verir ki, insanlar açıqlama verərək gecə saat 2-dən növbə tutmaq üçün klinikanın qarşısına yığışdıqlarını bildiriblər. Görüntüdə izdiham yaşandığı nümayiş olunub.

Pasientlər bildirib ki, uzun növbədən sonra bəzən həkim növbəsinə yazıla bilirlər, bəzən isə növbə çatmır və geri qayıdırlar.

"Camaat saat 6-dan buradadır, qapını açmırlar" deyə, pasientlərdən biri bildirib. Bəziləri isə 1 həftə növbə gözlədiklərini əlavə edib.

Proqramın aparıcısı Sevda Rəsulqızı "Niyə başqa xəstəxanada həll olunan şeyi "Yeni klinika"ya gödnərirlər? Bir tədbir görülməlidir, elə bil Hindistandır. Heç kim kefindən ora gəlmir. Heç kimə səhər saatlarında gəlib oturmaq xoş deyil. Hamının min dərdi var. İnsanın dərdinin üstünə dərd gəlir. 2025-ci ildə biz bunu niyə tənzimləyə bilmirik? Kimdir bunları ora göndərən? Orada gözləyənlərin məsuliyyətini daşımırıq nə deməkdir? Bir şərait qurun, yazıq deyil insanlar? Soyuqda qalırlar orada" deyə, məsələyə fikir bildirib.

Digər aparıcı Rahil Səyyadoğlu isə "Növbə çoxdur, aparat sayı azdır, çoxaltsınlar. Göndəriş ora olduğu üçün insanlar da ora yığılırlar. Bu zaman sığortanın əməkdaşlıq etdiyi klinika sayı artırılsın" deyə, əlavə edib.

Klinikanın əməkdaşı Nərmin Kazımova isə "Klinikada qəbul saat 9-dan başlayır. Qeydiyyat prosesi isə saat 08:00-dan etibarən həyata keçirilir. Onlar qeydiyyata görə klinikanın qarşısına erkən saatlarda gələn insanlardır" cavabını verib.

Görüntüləri buradan izləyin.

Telegramda izləyin