Hədə-qorxu və xırda xuliqanlıqla bağlı qanun tələbləri nələrdir? - AÇIQLAMA

Azərbaycan qanunvericiliyində ictimai asayişin pozulması, hədə-qorxu və digər oxşar hərəkətlərlə bağlı cəzalar dəqiq şəkildə müəyyən edilib.

Son illər bu kimi hüquqpozmalara daha ciddi yanaşılması, həm vətəndaşların təhlükəsizliyinin qorunması, həm də ictimai qaydanın təmin olunması məqsədi daşıyır. Qanunlarda göstərilən müddəalar həm cinayət, həm də inzibati məsuliyyət yaradan halları aydın şəkildə ayırır və hər bir pozuntu üçün tətbiq olunan sanksiyaları dəqiq ifadə edir.

Bəs görəsən bu kimi əməllərin qanunla cəzası nədir?

Vəkil Turan Abdullazadə bu barədə Sonxeber.az -a açıqlama verib:

"Azərbaycan Respublikası Cinayət Məcəlləsinin 182.1-ci maddəsinə əsasən, hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə, onların haqqında rüsvayedici məlumatlar yayma və ya onların əmlakını tələf etmə hədəsi ilə özgənin əmlakını və ya əmlaka olan hüququnu və ya əmlak xarakteri daşıyan digər hərəkətlər etməsini tələb etmə— üç ildən beş ilədək müddətə azadlıqdan məhrum etmə ilə cəzalandırılır.

Belə ki, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə -
əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur".

Telegramda izləyin