"Atalara uşağın doğulduğu ilk aylarda məzuniyyət verilməsi vacibdir" - AÇIQLAMA

Beynəlxalq Əmək Təşkilatının (BƏT) tələblərindən irəli gələrək Əmək Məcəlləsinə bir sıra dəyişikliklər ediləcək.

Sözügedən təkliflər Milli Məclisin Regional məsələlər komitəsinin bugünkü iclasında müzakirə olunub.

"Analığın mühafizəsi" Konvensiyasının tələblərinə əsasən Əmək Məcəlləsinə yeni hissə əlavə edilir.

Layihəyə əsasən, hamiləliyə və doğuşa görə məzuniyyətin doğuşdan əvvəlki hissəsinin müddəti doğuş gözlənilən gündən uşağın doğulduğu günədək ötən günlər qədər ödənişli olaraq uzadılır və bu halda məzuniyyətin doğuşdan sonrakı hissəsi qısaldılmayacaq. Həmçinin uşağının doğulması ilə əlaqədar kişilərə tibb müəssisəsinin arayışı əsasında doğuşdan əvvəl və doğuşdan sonra olan dövrdə cəmi 14 təqvim günü müddətində ödənişli məzuniyyət veriləcək.

Bəs görəsən yeni valideyin olan kişilərə məzuniyyət verilməsi necə addımdır?

Bu barədə sosioloq Elçin Bayramlı Sonxeber.az -a açıqlama verib:

"Son illərdə ailə strukturu və həyat tərzi köklü dəyişikliklərə məruz qalıb. Əvvəllər evdə nənə-baba, bacı-qardaşlar uşağın böyüməsinə dəstək olurdu, amma indiki dövrdə ailələr daha kiçikdir və analar uşağın ilk aylarında çox vaxt tək qalırlar. Bu isə həm uşağın, həm də ananın sağlamlığı və rifahı üçün ciddi çətinliklər yaradır.

Analara həm uşağa baxmaq, həm də ev işlərini görmək eyni vaxtda çətin olur. Kişi işdə olduğundan, uşağın sağlamlığında problem yaranarsa, qadın tək qalır. Bu səbəbdən atalara uşağın doğulduğu ilk aylarda məzuniyyət verilməsi vacibdir.

Məzuniyyət həm uşağın və ailənin təhlükəsizliyi, həm yeni ananın işlərini idarə edə bilməsi, həm də ailə üzvləri arasındakı əlaqələrin möhkəmlənməsi üçün önəmlidir. Həmçinin uşağın emosional inkişafına və cəmiyyətin ümumi rifahına müsbət təsir göstərir.

Bu təcrübə bir çox ölkələrdə tətbiq olunur və bizim ölkəmizdə də tətbiq edilməlidir. Məzuniyyətin müddəti və ödəniş forması üçün uyğun bir mexanizm formalaşdırılmalıdır".

Telegramda izləyin