Məşhur futbolçunun Milad paylaşımı izləyiciləri qəzəbləndirdi

"Liverpul" klubunun və Misir milli komandasının ulduz futbolçusu Məhəmməd Salah Milad bayramı münasibətilə etdiyi paylaşım ilə yenidən sosial mediada müzakirələrə səbəb olub. Müsəlman futbolçu kimi hər il bu ənənəni davam etdirməsi bəzi izləyicilər tərəfindən tənqid edilsə də, paylaşımı anlayış və dəstək mesajları ilə qarşılayanlar da az olmayıb.

Sonxeber.az xarici mediaya istinadən xəbər verir ki, futbolçu 11 yaşlı qızı Makka və 5 yaşlı qızı Kayanla birlikdə bəzədilmiş Milad ağacının önündə çəkilən şəkli sosial şəbəkə hesabında yayımlayıb. Fotoya yalnız "#MerryChristmas" qeydini əlavə edib.

Paylaşımdan sonra bəzi izləyicilər Salahın mesajının İslam inancı ilə uyğun gəlmədiyini irəli sürüb. Şərhlərdə futbolçunun nümunəvi şəxsiyyət kimi daha diqqətli davranmalı olduğu vurğulanıb və bu cür paylaşımların yanlış nümunə yarada biləcəyi iddia edilib.

Tənqidlərə baxmayaraq, paylaşım çoxlu sayda müsbət rəy də toplayıb. Həm müsəlman, həm də qeyri-müsəlman izləyicilər Salahın mesajını tolerantlıq və birlik çağırışı kimi dəyərləndiriblər. Şərhlərdə fərqli inanclara hörmətin önəmi vurğulanıb və futbolçunun bu ənənəni uşaqları üçün mənalı şəkildə davam etdirdiyi qeyd olunub.

Qeyd edək ki, Salah Milad günlərini ailəsi ilə keçirə bilməyib. Afrika Millətlər Kuboku çərçivəsində milli komandanın düşərgəsində olan misirli futbolçu Milad günü məşq edib. Karyerasında ilk Afrika Millətlər Kubokunu qazanmağı hədəfləyən Salah üçün bu dövrdə futbol əsas prioritet olub.

Telegramda izləyin