ABŞ-də dəhşətli hadisə: Evdən 100-dən çox insan kəlləsi və sümükləri tapıldı

ABŞ-nin Pensilvaniya ştatında yerli sakinlərdən birinin evində 100-dən çox insan kəlləsi və digər qalıqlar aşkar edilib.

Bu barədə Oxu.Az "Sky News" nəşrinə istinadən xəbər verir.

Məlumata görə, 34 yaşlı Conatan Gerlaxın mənzilində, eləcə də ona məxsus anbarda polis əməkdaşları çoxsaylı sümüklər, mumiyalanmış qol və ayaqlar, çürümüş gövdələr,skelet qalıqları tapıblar.

"Onlar müxtəlif vəziyyətlərdə idilər. Bəziləri, belə demək olarsa, asılmışdı. Bir hissəsi müxtəlif hissələrdən yığılmışdı, bəziləri isə sadəcə rəfdəki kəllələr idi", - deyə Delaver dairəsinin prokuroru Tanner Raus bildirib.

Qeyd edilir ki, bu hadisə Filadelfiyanın ətrafındakı Maunt-Moria qəbiristanlığında baş verən məzar oğurluqları ilə bağlı araşdırma nəticəsində ortaya çıxıb.

Polis iddia edir ki, Conatan Gerlax təxminən 150 000 məzarın olduğu ərazidəki məqbərələri və yeraltı kriptləri məqsədyönlü şəkildə seçib. Səlahiyyətlilər həmçinin dəfnlərlə əlaqəli olduğu ehtimal edilən zərgərlik məmulatlarını da tapdıqlarını bəyan ediblər. Hətta məzar yerlərindən birində kardiostimulyator da olub.

Gerlaxın qalıqları nə məqsədlə oğurladığı dəqiq məlum deyil, lakin Tanner Raus onlardan bəzilərinin yüzlərlə yaşı olduğunu qeyd edib.

Conatan Gerlax əlində lom ilə məzarlıqdan öz maşınına doğru qayıdarkən həbs edilib. Məhkəmə sənədlərinə əsasən, o həmin vaxt iki azyaşlı uşağın mumiyalanmış qalıqlarının, üç kəllənin və digər sümüklərin olduğu çantanı da özü ilə daşıyırmış.

Gerlaxa qarşı oğurluq, oğurlanmış əmlakın satışı və cəsədin təhqir edilməsi də daxil olmaqla, 300 maddə üzrə ittiham irəli sürülüb.

O, həmçinin ictimai abidənin, tarixi dəfn yerinin təhqir edilməsi ilə bağlı onlarla digər maddə üzrə də təqsirləndirilir.

Conatan Gerlax Moria dağı yaxınlığından təxminən 30 insan qalığını oğurladığını etiraf edib.

Telegramda izləyin