İrandan Azərbaycana gətirilən malların qiyməti bahalaşacaq? - AÇIQLAMA

Hazırda İranda baş verən proseslər həm daxili sabitlik, həm də region ölkələri ilə münasibətlər baxımından diqqətlə izlənilir. Ölkə daxilində siyasi, iqtisadi və sosial gərginliyin artması, beynəlxalq müstəvidə isə sanksiyalar, diplomatik təzyiqlər və regional təhlükəsizlik məsələləri İranın ümumi vəziyyətinə ciddi təsir göstərir. Xüsusilə enerji, maliyyə və ticarət sahələrində yaranan çətinliklər ölkənin ixrac imkanlarını zəiflədir, logistika və tədarük zəncirlərində fasilələrə səbəb olur.

Bununla yanaşı, regionda baş verən geosiyasi proseslər və mümkün eskalasiya ehtimalları da İran ətrafında qeyri-müəyyənliyi artırır. Mövcud vəziyyət təkcə İranın daxili bazarına deyil, eyni zamanda onunla sıx ticarət əlaqələri olan qonşu ölkələrə, o cümlədən Azərbaycana da birbaşa və dolayı təsirlər göstərmək potensialına malikdir. Məhz bu baxımdan İranda baş verən proseslərin inkişaf dinamikası regional iqtisadi sabitlik üçün mühüm amil kimi qiymətləndirilir.

Bəs görəsən mövcud vəziyyət İrandan Azərbaycana gətirilən malların qiymətlərinin bahalaşmasına təsir edəcək?

Mövzu ilə bağlı iqtisadçı Xalid Kərimli Sonxeber.az -a açıqlama verib:

"Mövcud vəziyyət fonunda İrandan Azərbaycana gətirilən malların idxalında ciddi problemlər yarana bilər. Bu problemlər təkcə logistika və tədarük zənciri ilə məhdudlaşmır, eyni zamanda həmin məhsulların qiymətlərində də bahalaşmaya səbəb ola bilər.

İrandan idxal olunan məhsulların bazarda əsas üstünlüyü onların nisbətən ucuz olmasıdır. Məhz bu səbəbdən bir çox sahibkar və istehlakçı üçün İran məhsulları alternativ bazarlara nisbətən daha əlverişli hesab olunur. Lakin İrandan mal gətirilməsində çətinliklər yaranarsa, istər-istəməz alternativ bazarlara üz tutmaq lazım gələcək ki, bu da əlavə xərclər deməkdir.

Məsələn, eyni məhsulun Türkiyə kimi alternativ ölkələrdən idxalı daha baha başa gəlir. Bu fərq həm nəqliyyat xərcləri, həm də məhsulun maya dəyəri ilə bağlıdır. Nəticə etibarilə, alternativ bazarlardan gətirilən mallar daxili bazarda qiymətlərin ümumi artımına səbəb ola bilər.

Bütün bu proseslərin hansı istiqamətdə inkişaf edəcəyi isə birbaşa olaraq İranda baş verən hadisələrin nə qədər davam edəcəyindən, vəziyyətin gərginləşib-gərginləşməyəcəyindən və ya nisbətən sakitləşəcəyindən asılı olacaq. Mövcud qeyri-müəyyənlik isə bazarda həm sahibkarlar, həm də istehlakçılar üçün risk faktorunu artırır'.

Çiçək Sadatova

Telegramda izləyin