"Fənərbağça" "Qalatasaray"ın ittihamlarına cavab verib

"Fənərbağça" klubu "Qalatasaray"ın Ali Koçla bağlı iddialarına cavab verib.

Oxu.Az xəbər verir ki, bu barədə klub sosial şəbəkə hesablarında paylaşım edib:

"Qalatasaray" klubunun keçmiş prezidentimiz Ali Koçla bağlı verdiyi açıqlamanı qəbuledilməz hesab edirik. Cənab Ali Koç vasitəsilə öz icmalarını birləşdirmək məqsədilə süni polemika yaratmağı qəti şəkildə rədd edirik: keçmiş prezidentimizi meydandankənar mübahisələrin mövzusu etməyi doğru hesab etmirik.

Son dövrlərdə Türkiyə idman ictimaiyyətində meydandankənar açıqlamalar vasitəsilə bir fikir yaratmaq üçün daim cəhdlər olduğu aydındır. Klubumuz bu yanaşmaya qarşıdır. Keçmişdə olduğu kimi yalnız idman yarışlarına diqqət yetirməyə davam edirik.

Türkiyə idmanının ehtiyac duyduğu şey gərginliyi artıran, icmaları bir-birinə qarşı qoyan və ictimaiyyətin gözündə polemika yaratmağı hədəfləyən açıqlamalar deyil, əksinə sağlam düşüncə, məsuliyyət və mülayimlikdir.

Klubumuz indiyə qədər etdiyi kimi idmanın meydanda qalmasını və Türkiyə idmanının dinc bir mühitdə inkişaf etməsini təmin etmək üçün qətiyyətlə öz məsuliyyətini yerinə yetirməyə davam edəcək".

Qeyd edək ki, dünən "Qalatasaray" klubu rəsmi sosial media hesabında "Fənərbağça"nın keçmiş prezidenti Ali Koçu hədəf alan "Bu ölkənin idmanı səndən bezdi, Ali Koç!" başlıqlı yazı paylaşıb.

Klubun sözügedən reaksiyasına səbəb Ali Koçun "Qalatasaray"ın baş məşqçisi Okan Buruka qarşı təhdid dolu ifadələr işlətməsi iddiası olub. Bəyanatda qeyd olunur ki, A.Koçun O.Buruku təhdid etməsi sadəcə hüquqi müstəvidə cinayət deyil, həm də futbol sahəsindəki rəqabəti qaranlıq məcralara çəkmək cəhdidir. "Sarı-qırmızılar" A.Koçu ailəsinin və sahib olduğu holdinqin gücündən istifadə edərək təhdidkar davranmaqda ittiham ediblər. Qeyd edək ki, klub rəhbərliyi baş məşqçiyə qarşı edilən hər hansı təhdidin birbaşa klubun özünə edildiyini və rəhbərliyin onun sonuna qədər arxasında olduğunu bildirib.

Telegramda izləyin