Bakıda 16 yaşlı boksçumuz Əli Ruşanov FACİƏVİ ŞƏKİLDƏ ÖLDÜ - YENİLƏNİB

III MDB Oyunlarında bürünc medal qazanan boksçu, 16 yaşlı Əli Ruşanovun ölməsinin təfərrüatı məlum olub.

Oxu.Az bildirir ki, Azərbaycan Boks Federasiyasından "Qafqazinfo"ya verilən məlumata görə, bu gün iki yeniyetmə boksçu - Vaqif Rüfət oğlu Məhəmmədli və Əli Fazil oğlu Ruşanov arasında şəxsi məşqçilərinin istəyi ilə sınaq döyüşü (sparrinq) keçirilib.

"6-7 dəqiqə davam edən sparrinq zamanı Əli Ruşanov huşunu itirərək yerə yıxılıb. Dərhal təcili yardım briqadası müdaxilə edib və o, 1 saylı Şəhər Kliniki Xəstəxanasına çatdırılsa da, orada vəfat edib.

Vaqif Məhəmmədli və Əli Ruşanov yaxın günlərdə keçiriləcək yeniyetmələr arasında Azərbaycan çempionatına hazırlaşmaq üçün məşqçiləri ilə birgə Bakıya gəliblər.

Hadisə ilə bağlı hüquq mühafizə orqanları tərəfindən araşdırma aparılır", - federasiyadan qeyd edilib.

21:00

III MDB Oyunlarında bürünc medal qazanan boksçu, 16 yaşlı Əli Ruşanov ölüb.

Sonxeber.az "Unikal"a istinadla xəbər verir ki, gənc boksçu məşqçi atasının yetirmələrinin yarışını izləmək üçün paytaxta gəlib və burada həyatını itirib.

2010-cu il təvəllüdlü Əli Fazil oğlu Ruşanov dəfələrlə ölkə və beynəlxalq yarışlarda uğurlu çıxışları ilə yadda qalıb.

O, təcrübəli məşqçi olan atası Fazil Ruşanovun yetirmələrinin çıxışlarını izləmək niyyətində olub. İlkin məlumata görə, gənc boksçu yıxılaraq xəsarət alıb, onun həyatını xilas etmək mümkün olmayıb.

Telegramda izləyin