Sevilən sənətkar Murad Laçından Unudulmaz Gecə - "Şirin yuxun olaydım" Konserti Böyük Alqışlarla Qarşılandı

7 yaşından xanəndəlik sənətinin incəliklərini öyrənməyə başlayan Murad Laçın ilk dərslərini görkəmli sənətkar Əlibaba Məmmədovdan alaraq muğam yolunda möhkəm təməl formalaşdırıb. Təhsilini Bülbül adına Orta İxtisas Musiqi Məktəbində davam etdirən sənətçi uşaq yaşlarından respublika və beynəlxalq müsabiqələrdə iştirak edərək diqqətçəkən uğurlar qazanıb.

9 yaşında "Kainat" Muğam müsabiqəsində Qran-pri mükafatına layiq görülməsi onun böyük istedadının ilk parlaq göstəricilərindən biri olub. Dövlət tədbirlərində və televiziya proqramlarında çıxış edən sənətçi "Qarabağ bülbülləri"nin solisti kimi də fəaliyyət göstərərək milli musiqimizi ləyaqətlə təmsil edib.

Rusiyada keçirilən Azərbaycan günlərində çıxış edən Murad Laçın Azərbaycan Respublikasının Prezidenti İlham Əliyev və Rusiya Prezidenti Vladimir Putinin qarşısında "Bayatı-Şiraz" muğamını və "Qarabağ şikəstəsi"ni böyük ustalıqla ifa edərək yüksək qiymət alıb.

2007-ci ildə Azərbaycan Dövlət Milli Konservatoriyasına daxil olan sənətçi ustad xanəndə Qəzənfər Abbasovdan dərs alaraq sənət yolunu daha da kamilləşdirib. Hazırda Georgi Şaroyev adına 35 nömrəli onbirillik musiqi məktəbində xanəndəlik dərsi keçərək öz zəngin təcrübəsini gənc nəslə ötürür.

2019-cu ildə İsveçdə keçirilən Ümumdünya Azərbaycanlılarının Həmrəylik Günündə və Ankarada təşkil olunan musiqi festivalında ölkəmizi uğurla təmsil edən sənətçi, həmin il VII Muğam Televiziya Müsabiqəsində II yerə layiq görülərək sənət yolunda növbəti möhtəşəm uğura imza atıb.

Murad Laçın "Şirin yuxun olaydım" adlı möhtəşəm konsert proqramı ilə Opera studiyasının səhnəsində sənətsevərlərə unudulmaz bir gecə yaşatdı. Zövqlə seçilmiş repertuarı və fərqli ifa tərzi ilə tamaşaçıları ilk notlardan ovsunlamağı bacardı.

Konsertdə millət vəkilləri, ziyalılar və tanınmış simalar iştirak edərək gecəyə xüsusi nüfuz qatdılar. Xalq artisti Baba Vəziroğlu, Əməkdar artist Sevinc Sarıyeva və Əməkdar artist Simarə İmanova da Murad Laçının uğuruna sevinənlər arasında idi. Bir-birindən gözəl duetlər proqramın ən yaddaqalan məqamlarına çevrildi. Əməkdar artist Könül Kərimova, şair Cığatel və Leyla Camal səhnəni sənətçi ilə bölüşərək duyğulu anlar yaşatdılar.

Gecənin aparıcısı sevilən televiziya siması Zümrüd Şahova idi. Onun peşəkar təqdimatı konsertə xüsusi ahəng qatdı.

Murad Laçın gecədə böyük ustad Alim Qasımovun "Qalanı xatirədir" əsərini möhtəşəm şəkildə ifa edərək zalı ayağa qaldırdı və uzun sürən alqışlara səbəb oldu.

Konsertdən əvvəl media nümayəndələri ilə görüşən sənətçi yaxın zamanda reallaşdıracağı böyük layihələrdən söz açdı.

"Şirin yuxun olaydım" solo konsertin gecəsi Murad Laçının yaradıcılığında parlaq və yadda qalan sənət hadisəsinə çevrildi.

Humayn Group instrumental ansamblı möhtəşəm konsert proqramının yaradılmasında xüsusi rol oynayıb. Peşəkar sənətçiləri bir araya gətirən ansambl axşama yeni nəfəs verib və tamaşaçılara unudulmaz anlar yaşadıb.

Canlı ifalar, ustalıqla hazırlanmış improvizasiyalar və səhnə harmoniyası tədbirə xüsusi bir toxunuş qatıb. Ansamblın hər bir üzvü sənətkarlığı ilə seçilib və proqramın yüksək səviyyədə təqdimatına töhfə verib.

Tar ifaçısı Saleh Salahov muğam melodiyaları ilə səhnəyə milli ruh gətirib. Kamança ifaçısı Elnur Salahov incə və səmimi ifası ilə musiqinin emosional xəttini gücləndirib. Balaban ifaçısı Emin Fətəliyev özünəməxsus nəfəsli alətlər interpretasiyası ilə tamaşaçıların qəlbini fəth edib.

Elektron piano solo müşayiətçisi Nəriman Əliyev və elektro piano müşayiətçisi Ceyhun Qurbanov müasir və klassik elementləri məharətlə sintez edərək konsertin musiqi strukturunu zənginləşdiriblər. Ritm bölməsində nağaraçı Siyavuş Kərimov və zərb alətləri ifaçısı Saday Bədəlov dinamik ifaları ilə proqramın enerjisini zirvəyə çatdırıblar

Telegramda izləyin