Gənc qadını boş tikinti sahəsinə aparıb təcavüz etdilər

Muğlanın Bodrum rayonunda qadına qarşı ağır cinayət iddiası ilə bağlı araşdırma aparılır.

Sonxeber.az türk mediasına istinadən xəbər verir ki, hadisənin Yalıkavak ərazisində baş verdiyi bildirilir. Məlumata görə, Özbəkistan vətəndaşı, 36 yaşlı M.S. avtobus gözləyərkən yanına yaxınlaşan avtomobildəki iki nəfər onu gedcəyi yerə çatdıracaqlarını deyərək maşına mindiriblər. Qadının iddiasına görə, onlar onu yaşayış ünvanına aparmaq əvəzinə tikinti sahəsinə yönəldərək zorla içəri daxil edib, hədə-qorxu gələrək cinsi zorakılığa məruz qoyublar.

Zərərçəkən bildirib ki, hadisə zamanı şəxslərdən biri zorakılığı törədərkən digəri bunu videoya çəkib və şikayət edəcəyi təqdirdə görüntüləri yaymaqla hədələyib. Hadisədən sonra isə onun çantası, telefonu və pul vəsaiti götürülərək ərazidən uzaqlaşıblar.

Tikinti sahəsindən çıxan qadın yaxınlıqdakı evlərdən birinə sığınaraq kömək istəyib. O, təcili tibbi yardım vasitəsilə xəstəxanaya çatdırılıb və hazırda müalicə altındadır.

Faktla bağlı polis tərəfindən cinayət işi başlanıb, şübhəlilərin müəyyən edilərək saxlanılması istiqamətində əməliyyat-axtarış tədbirləri davam etdirilir. Hadisə ilə bağlı ərazidəki müşahidə kameralarının görüntüləri də araşdırılır.

Qadın hüquqları müdafiəçiləri isə hadisəyə sərt reaksiya verərək, günahkarların tez bir zamanda tapılıb ən ağır şəkildə cəzalandırılmasını tələb ediblər.

Telegramda izləyin