Alış-veriş xəstəliyi faciə ilə bitdi: Qadın evində, aldığı əşyaların altında qalaraq öldü

İtalyanın Verona şəhərində psixoloji mənşəli dispozofobiya xəstəliyi növbəti dəfə faciə ilə nəticələnib.

Sonxeber.az xarici mediaya istinadən xəbər verir ki, 57 yaşlı Maria R. uzun illər ərzində topladığı əşyaların altında qalaraq öz evində həyatını itirib.

Məlumata görə, qadından bir neçə gün xəbər ala bilməyən sevgilisi vəziyyətdən narahat olaraq aidiyyəti qurumlara müraciət edib. Hadisə yerinə gələn xilasedicilər və hüquq-mühafizə orqanlarının əməkdaşları mənzilə daxil olmaqda çətinlik çəkiblər. Belə ki, giriş qapısının arxası tamamilə müxtəlif əşyalarla dolu olub.

Qapını güclə açan xilasedicilər evin içərisində də eyni mənzərə ilə qarşılaşıblar. Mənzilin hər tərəfi bit bazarlarından və internet üzərindən alınmış paketlər, çantalar və müxtəlif əşyalarla dolu olub, ev rəsmən anbara çevrilib.

Aparılan ilkin araşdırma zamanı Maria R.-nin meyiti əşyaların sıx yığıldığı, demək olar ki, keçilməz vəziyyətə düşmüş bir hissədə aşkarlanıb. İlkin ehtimallara görə, qadın üzərinə aşan ağır əşya yığınlarının altında qalaraq hərəkətsiz vəziyyətdə sıxılıb və havasızlıqdan dünyasını dəyişib. Onun yardım istəmək imkanının olmadığı güman edilir.

Bildirilir ki, dispozofobiyadan əziyyət çəkən qadın evinə kənar şəxslərin daxil olmasına icazə vermirmiş. O, mənzil daxilində yalnız özünün bildiyi dar keçidlərdən ibarət bir növ "labirint" yaradıb. Bu isə hadisə zamanı kənardan müdaxiləni demək olar ki, mümkünsüz edib.

Mütəxəssislər qeyd edirlər ki, dispozofobiya kimi tanınan bu psixoloji pozuntu vaxtında müdaxilə edilmədikdə həm insanın sosial həyatına, həm də fiziki təhlükəsizliyinə ciddi risklər yarada bilər.

Telegramda izləyin