Dünyanın ən yaxşı xəstəxanaları AÇIQLANDI

Xəstəxana seçimi çox vaxt asan olmur. Adətən bu qərar qeyri-müəyyənlik şəraitində, artıq xəstəni narahat edən qeyri-adi simptomlar və ya mürəkkəb diaqnoz fonunda verilir və bu da əlavə psixoloji yük yaradır.

Lent.az xəbər verir ki, Qlobal statistika platforması olan Statistanın məlumatına görə, 2026-cı ildə dünyada xəstəxanaların sayının təxminən 216 minə çatacağı gözlənilir.

Bu qədər geniş seçim fonunda xəstələr və onların ailələri üçün düzgün qərar vermək olduqca çətinləşir.

Məhz bu boşluğu doldurmaq məqsədilə Newsweek jurnalı Statista ilə əməkdaşlıq çərçivəsində "Dünyanın ən yaxşı xəstəxanaları 2026" reytinqini təqdim edib.

Bu ilki qiymətləndirmə 32 ölkəni əhatə edir. Siyahıya Avstraliya, Avstriya, Belçika, Braziliya, Kanada, Çili, Kolumbiya, Danimarka, Finlandiya, Fransa, Almaniya, Hindistan, İsrail, İtaliya, Yaponiya, Malayziya, Meksika, Niderland, Norveç, Filippin, Cənubi Koreya, İspaniya, İsveç, İsveçrə, Tayvan, Tailand, Türkiyə, Birləşmiş Ərəb Əmirlikləri, Böyük Britaniya və ABŞ daxildir. Bu ölkələr əhali sayı, orta ömür uzunluğu, həyat səviyyəsi, xəstəxana sıxlığı və etibarlı məlumatların mövcudluğu kimi meyarlar əsasında seçilib.

Reytinq hazırlanarkən hər bir xəstəxana dörd əsas göstərici üzrə qiymətləndirilib:

Tibbi ekspertlərin (həkimlər, xəstəxana rəhbərləri və digər səhiyyə mütəxəssisləri) tövsiyələri,

Xəstəxananın fəaliyyət keyfiyyəti göstəriciləri,

Pasiyent təcrübəsi ilə bağlı məlumatlar,

Statista tərəfindən aparılan və pasiyentlərin öz sağlamlıq vəziyyətlərini və həyat keyfiyyətlərini qiymətləndirdiyi PROM sorğuları.

2026-cı il metodologiyası əvvəlki illərlə müqayisədə genişləndirilib. İlk dəfə olaraq Filippin və Türkiyə reytinqə daxil edilib. Bundan əlavə, bu il xəstəxanaların keyfiyyət göstəricilərinə daha çox əhəmiyyət verilib, akkreditasiya, təhlükəsizlik və pasiyent təcrübəsi ilə bağlı yeni məlumatlar nəzərə alınıb. PROM göstəricilərinin rolu isə daha da artırılıb.

Ümumilikdə bu il 2500-dən çox xəstəxana qiymətləndirilib və onların arasından 250-si xüsusi olaraq seçilərək ən yaxşılar siyahısına daxil edilib.

Reytinqin ilk beşliyində aşağıdakı xəstəxanalar yer alır:

1. Mayo Clinic (ABŞ, Roçester)

2. Toronto General Hospital (Kanada, Toronto)

3. Cleveland Clinic (ABŞ, Klivlend)

4. Karolinska Universitet Xəstəxanası (İsveç, Stokholm)

5. Massachusetts General Hospital (ABŞ, Boston)

Dünyanın ən yaxşı 50 xəstəxanası

Siyahıda ABŞ, Kanada, Avropa və Asiyanın aparıcı tibb müəssisələri üstünlük təşkil edir. Bunlara Johns Hopkins Hospital (ABŞ), Charité - Berlin Universitet Klinikası (Almaniya), Sürix Universitet Xəstəxanası (İsveçrə), Tokyo Universitet Xəstəxanası (Yaponiya), Samsung Medical Center (Cənubi Koreya), Mount Sinai Hospital (ABŞ və Kanada), Stanford Hospital (ABŞ), Erasmus MC (Niderland), eləcə də digər nüfuzlu səhiyyə mərkəzləri daxildir.

Mütəxəssislərin fikrincə, bu reytinq pasiyentlərə və onların ailələrinə daha məlumatlı seçim etməyə kömək edir və qlobal səhiyyə sistemində keyfiyyətin yüksəldilməsinə töhfə verir.

Telegramda izləyin