Hansı dırnaq dəyişiklikləri xəstəliklərə işarə edir

Dırnaqların rəngində, formasında və ya strukturunda baş verən dəyişikliklər təkcə kosmetik problem deyil, həm də orqanizmdə ciddi pozuntuların siqnalı ola bilər.

Lent.az xəbər verir ki, dırnaqların görünüşü insanın sağlamlıq vəziyyəti haqqında düşündüyümüzdən daha çox məlumat verə bilər. Həkimlər diaqnostika zamanı onların rənginə, formasına və quruluşuna xüsusi diqqət yetirirlər. Məsələn, əməliyyatdan əvvəl xəstələrdən dırnaq lakını silmək tələb olunur. Bu, estetik səbəbdən deyil, dırnaq lövhəsinin təbii vəziyyətinə baxaraq sağlamlıq haqqında məlumat əldə etmək üçündür. Ailə həkimi və tibbi məsləhətçi Cüzeppe Araqonanın sözlərinə görə, bəzi dəyişikliklər zərərsiz olsa da, digərləri ciddi xəstəliklərin əlaməti ola bilər.

Sarı dırnaqlar

Dırnaqların saralması çox vaxt göbələk infeksiyasına işarə edir, xüsusilə də dırnaqlar qalınlaşıb və yavaş uzanırsa. Nadir hallarda isə bu hal xroniki tənəffüs xəstəlikləri və ya limfa sistemi problemləri ilə bağlı ola bilər, xüsusilə də bədəndə şişkinlik müşahidə olunursa.

Tünd xətlər və ya zolaqlar

Dırnaq boyunca uzanan tünd xətt və ya zolaqlar ciddi qəbul olunmalıdır, xüsusilə də yeni yaranıbsa və ya dəyişirsə. Bəzi hallarda bu, dırnaqaltı melanoma (dəri xərçəngi növü) əlaməti ola bilər və dərhal müayinə tələb edir. Digər hallarda isə bu dəyişiklik travma, dərman qəbulu və ya genetik meyl ilə bağlı ola bilər.

Ağ ləkələr

Çoxları düşünür ki, ağ ləkələr kalsium çatışmazlığından yaranır, lakin bu doğru deyil.
Bu, çox yayılmış haldır və adətən dırnağın kiçik zədələnməsi nəticəsində yaranır.

Qaşıq formalı dırnaqlar

Bu vəziyyət tibbdə "koiloniya" adlanır. Dırnaqlar düz deyil, içəriyə doğru çökük qaşıq formasında olur. Bu, çox vaxt dəmir çatışmazlığı ilə əlaqələndirilir və bəzən anemiya əlaməti ola bilər. Həkimlər bu vəziyyəti digər simptomlarla birlikdə qiymətləndirirlər. Məsələn, yorğunluq və nəfəs darlığı.

Nəticə

Dırnaqlarda baş verən dəyişiklikləri diqqətdən qaçırmaq olmaz. Onlar bəzən sadə səbəblərlə bağlı olsa da, bəzi hallarda ciddi xəstəliklərin erkən siqnalı ola bilər. Buna görə şübhəli dəyişikliklər olduqda mütləq həkimə müraciət etmək tövsiyə olunur.

Telegramda izləyin