Şok araşdırma: Köpək balıqlarında kokain və dərman qalıqları aşkarlanıb

Bahamalar ətrafında aparılan elmi araşdırma gözlənilməz nəticələr ortaya qoyub. Tədqiqat zamanı üç növ köpək balığında kokain, kofein və müxtəlif dərman qalıqları aşkar edilib.

Sonxeber.az xarici mediaya istinadən xəbər verir ki, "Environmental Pollution" jurnalında dərc olunan araşdırmada Karib rif, Atlantik "nurse" və limon köpək balığı növləri analiz edilib. Ümumilikdə 85 köpək balığı üzərində aparılan tədqiqat zamanı onların orqanizmində dəyişkən səviyyələrdə kokain, kofein, eləcə də Diklofenak və Asetaminofen kimi maddələrə rast gəlinib.

Alimlər bu maddələri "yeni ortaya çıxan çirkləndiricilər" (CEC) kimi qiymətləndirirlər. Bu termin ətraf mühitdə müşahidə olunan, lakin hələ tam tənzimlənməyən və həm ekosistem, həm də insan sağlamlığı üçün risk yarada bilən maddələri ifadə edir.

Araşdırmada xüsusilə turizm sektorunun təsiri vurğulanır. Bildirilir ki, istirahət evlərinin və kirayə obyektlərinin sayının artması nəticəsində tullantı sularının həcmi və kimyəvi tərkibi ciddi şəkildə yüksəlib. Bu isə dəniz ekosistemlərinə birbaşa təsir göstərir.

Tədqiqatın nəticələri göstərir ki, zahirən təmiz və toxunulmamış hesab edilən bölgələrdə belə gizli çirklənmə riski mövcuddur. Alimlər bu vəziyyətin gələcəkdə həm dəniz canlıları, həm də insanlar üçün daha böyük təhlükələr yarada biləcəyini istisna etmirlər.

Telegramda izləyin