Sultan Süleymanla bağlı etdiyi zarafat onu həbsə apardı

Türkiyədə tanınmış komediyaçı Tuba Ulu səhnədə səsləndirdiyi ifadələrə görə hüquq-mühafizə orqanları tərəfindən saxlanılıb.

Sonxeber.az türk mediasna istinadən xəbər verir ki, Ulu stand-up çıxışı zamanı Osmanlı hökmdarı Qanuni Sultan Süleyman barədə səsləndirdiyi zarafata görə "tarixi, milli və mənəvi dəyərlərə təhqir" ittihamı ilə gözaltına alınıb.

Hadisə ilə bağlı araşdırma komediyaçının çıxışı zamanı dediyi sözlərin sosial şəbəkələrdə yayılmasından sonra başlanıb. Jurnalist Burak Doğan tərəfindən yayılan məlumata əsasən, görüntülərin geniş yayılması hüquq-mühafizə orqanlarının diqqətini cəlb edib və bundan sonra tədbir görülüb.

Prokurorluq tərəfindən başladılan istintaq çərçivəsində Tuba Ulu barəsində "tarixi, milli və mənəvi dəyərlərə təhqir" maddəsi ilə araşdırma aparılır. Onun hazırda polis bölməsində ifadəsinin alındığı bildirilir.

Hadisədən sonra sosial mediada müxtəlif fikirlər səsləndirilib. Bəzi istifadəçilər komediyaçının çıxışını tənqid edərkən, digərləri bunu ifadə azadlığı çərçivəsində qiymətləndirib.

İstintaqın gedişindən asılı olaraq Tuba Ulunun yaxın vaxtlarda məhkəməyə çıxarılacağı gözlənilir.

Telegramda izləyin