40 illik avtomobili sata bilməyən şəxsə maraqlı təkliflər: "Yarım dişlənmiş dönər verən var" - VİDEO

Türkiyənin Eskişehir şəhərində yaşayan Enes Özçelik satışa çıxardığı köhnə avtomobil üçün aldığı qeyri-adi təkliflərlə gündəmə gəlib.

Sonxeber.az türk mediasına istinadən xəbər verir ki, sosial şəbəkədə paylaşdığı video qısa zamanda geniş yayılıb və istifadəçilərin diqqətini çəkib.

Ticarətlə məşğul olan Enes Özçelik 40 illik avtomobilini satmaq üçün fərqli üsula əl atıb. O, avtomobilin videosunu çəkərək təxminən 55 min lirə qiymət qoyduğunu və müxtəlif əşyalarla barterə də açıq olduğunu bildirib. Bundan sonra ona sosial media üzərindən çoxsaylı təkliflər gəlməyə başlayıb.

Özçelik bildirib ki, təkliflər arasında olduqca maraqlı və gülməli variantlar da yer alıb: "Yarım dişlənmiş dönər təklif edən var, 1 litr kola, 1 qutu su verən var". O, gələn mesajlara gülümsəyərək cavab verdiyini deyib.

Hətta bəzən avtomobili harada park etdiyini belə unutduğunu qeyd edən Özçelik, maşını 2-3 ay sonra tapdığını bildirib. Onun sözlərinə görə, avtomobilin 1986-cı il buraxılışı olduğu ehtimal edilir və uzun müddət istifadə olunmayıb.

Paylaşımının bu qədər maraq doğuracağını gözləmədiyini deyən Özçelik bildirib ki, videonu sadəcə əyləncə məqsədilə çəkib: "İnsanlar bir az əylənsin deyə paylaşdım. Maraqlı reaksiyalar gəlir, mən də məmnunam".

Avtomobili satmaq niyyətində olduğunu vurğulayan Özçelik əlavə edib ki, qiymət əvvəlcə 55 min lirə olaraq müəyyən edilib. Lakin indi onu pula çevrilə biləcək istənilən əşya ilə dəyişməyə hazırdır: "Telefonla da barter olar, dəyərinə uyğun kola ilə də dəyişərəm. Əsas odur satılsın, artıq ehtiyacım yoxdur".

Telegramda izləyin