Məşhur mağazanın ayaqqabıları saxta imiş! - VİDEO

Türkiyənin Taksim ərazisində məşhur brendlərin saxta ayaqqabılarını satan bir obyektə keçirilən əməliyyat zamanı çox sayda məhsul müsadirə olunub.

Sonxeber.az türk mediasına istinadən xəbər verir ki, polis əməkdaşlarının keçirdiyi reydin görüntüləri qısa müddətdə sosial mediada geniş yayılıb.

Kadrlarda hüquq-mühafizə orqanlarının əməkdaşlarının mağazaya daxil olaraq axtarış apardığı, rəflərdə yerləşdirilən çoxsaylı ayaqqabıları bir-bir yoxladığı əks olunub. Araşdırma zamanı məhsulların böyük hissəsinin dünya şöhrətli brendlərin saxta versiyaları olduğu müəyyən edilib.

Əməliyyat zamanı saxta olduğu ehtimal edilən ayaqqabıların toplanaraq kisələrə doldurulduğu və obyekt daxilində geniş yoxlamanın aparıldığı anlar da kameraya düşüb. Məlumata görə, mağazada olan məhsulların demək olar ki, hamısına əl qoyulub.

Diqqət çəkən məqamlardan biri isə sosial şəbəkələrdə 100 mindən çox izləyicisi olan obyekt sahibinin və ya əməkdaşının əməliyyat anlarını öz hesabından paylaşması olub. Bu görüntülər sürətlə yayılaraq ictimaiyyətin diqqətini cəlb edib.

Mütəxəssislər bildirirlər ki, xüsusilə turistik ərazilərdə saxta məhsulların satışına qarşı nəzarət tədbirləri daha da gücləndirilə bilər. Bu cür əməliyyatların davam etdiriləcəyi də istisna edilmir.

Telegramda izləyin