Şagirdlərini qoruyarkən həyatını itirən Ayla müəllimin acısına həyat yoldaşı tab gətirə bilmədi - VİDEO

Şanlıurfa və Kahramanmaraşda baş verən məktəb hücumları ölkədə dərin kədərə səbəb olub.

Sonxeber.az türk mediasına istinadən xəbər verir ki, Kahramanmaraşda yerləşən Ayser Çalık Orta Məktəbində 8-ci sinif şagirdi tərəfindən törədilən silahlı hücum nəticəsində 1 müəllim və 8 şagird həyatını itirib. Hücum zamanı həyatını itirən müəllimin riyaziyyat müəllimi Ayla Kara olduğu müəyyən edilib.

Məlumata görə, Ayla Kara şagirdlərini qorumaq üçün özünü onların qarşısına sipər edib. Onun güllələrin qarşısını almaq üçün şagirdlərin üzərinə qapanaraq həyatını itirdiyi bildirilib. Müəllimin bu fədakarlığı hadisənin ağrısını daha da artırıb.

Həmkarları və şagirdləri tərəfindən sevilən müəllim kimi tanınan Ayla Karanın ölümü təhsil ictimaiyyətində böyük üzüntü ilə qarşılanıb. Sosial şəbəkələrdə onun şagirdlərinə bağlılığı və nümunəvi şəxsiyyəti ilə bağlı çoxsaylı paylaşımlar edilib.

Hadisə nəticəsində müəllimin ailəsi ikinci bir sarsıntı da yaşayıb. Həyat yoldaşı onun məktəbdə vurularaq öldüyünü eşitdikdən sonra keçirdiyi şok nəticəsində ürəktutması keçirib. Hazırda xəstəxanada müalicə alan şəxsin vəziyyəti ilə bağlı gözlənti davam edir.

Telegramda izləyin