Tualet çökdü, turist qadın 2 metr dərinlikdəki bataqlığa düşdü

Avstraliyanın mərkəzi bölgələrində baş verən hadisə turizm məkanlarında təhlükəsizlik məsələlərini yenidən gündəmə gətirib.

Sonxeber.az xarici mediaya istinadən xəbər verir ki, ailəsi ilə birlikdə səfərdə olan qadın turist Henbury Meteorites Conservation Reserve ərazisində "drop toilet" kimi tanınan açıq sistemli tualetdən istifadə etmək istəyərkən qəza ilə üzləşib. Paslanmış döşəmənin çökməsi nəticəsində o, təxminən 2 metr dərinliyindəki tullantı çuxuruna düşüb.

Hadisə zamanı ərazidə mobil rabitə siqnalı olmadığı üçün qadının ailə üzvləri kömək çağırmaq məqsədilə ən yaxın yaşayış məntəqəsinə üz tutmalı olublar. Turist isə çətin şəraitdə, tullantıların içində təxminən 3 saat köməksiz vəziyyətdə qalıb.

Hadisə yerinə çatan xilasedicilər tualeti sökərək çuxura ip sallayıb və təxminən 45 dəqiqə davam edən əməliyyat nəticəsində qadını xüsusi texnika vasitəsilə çıxarıblar.

Qəza sonrası şok keçirdiyi bildirilən qadın yüngül xəsarətlərlə xəstəxanaya yerləşdirilib. Rəsmi qurumlar hadisənin baş verdiyi tualetin təhlükəsizlik səbəbilə bağlandığını və məsələ ilə bağlı araşdırma aparıldığını açıqlayıb.

Mütəxəssislər bildirirlər ki, insan tullantıları ilə təmas infeksiya, parazit və hepatit kimi ciddi sağlamlıq riskləri yarada bilər. Hadisədən sonra sosial şəbəkələrdə çoxsaylı istifadəçi oxşar təhlükələrə diqqət çəkib, bölgədə infrastruktur və təhlükəsizlik çatışmazlıqları tənqid olunub.

Telegramda izləyin