Faciəyə səbəb olan arı hücumu: minə yaxın qoyun tələf oldu - VIDEO

Türkiyənin Iğdır vilayətində yaylağa aparılan qoyun sürüsü arıların hücumuna məruz qalıb.

Sonxeber.az türk mediasına istinadən xəbər verir ki, hadisə Hakmehmet və Ağaver kəndləri arasında qeydə alınıb. Sürü sahibi İsmail Naral 4 minə yaxın qoyunu Tuzluca rayonundakı yaylağa aparmaq üçün 4 çobanla birlikdə yola çıxıb. Yolun bir hissəsində ərazidə yerləşən təxminən 200 arı pətəyindən çıxan arılar qəfil sürüyə hücum edib.

Arıların hücumundan qorxuya düşən heyvanlar nəzarətdən çıxaraq kütləvi şəkildə qaçmağa başlayıb. Qaçış zamanı qoyunlar suvarma kanalının kənarındakı maili sahəyə yuvarlanaraq bir-birinin üzərinə düşüb. İzdiham nəticəsində sürüdə böyük tələfat qeydə alınıb.

Hadisənin ilk saatlarında ölən heyvanların sayının 400 olduğu bildirilsə də, sonradan bu rəqəmin təxminən min olduğu müəyyənləşib.

Arı sancmaları nəticəsində sürü sahibi İsmail Naral və 4 çoban da xəsarət alaraq xəstəxanaya yerləşdirilib. Hadisə yerinə jandarma, AFAD və Iğdır bələdiyyəsinin yanğınsöndürmə briqadaları cəlb olunub. Əraziyə baxış keçirilir, tələfatın miqyası ilə bağlı rəsmi qiymətləndirmə aparılacağı gözlənilir.

Sürü sahibi baş verənləri belə izah edib: "Qoyunları yaylağa aparırdıq. Arılar hücum edəndə sürü panikaya düşdü və kanal kənarındakı boşluğa yuvarlandı. Təxminən min qoyunumuz tələf oldu. Zərərimiz çox böyükdür."

Hazırda hadisə ilə bağlı araşdırmalar davam edir.

Telegramda izləyin