14 qədəh tekila içib yıxılan tibb bacısı 300 min dollar təzminat qazandı

Kaliforniyadan olan 45 yaşlı tibb bacısı Diana Sanders, "Carnival Corporation" kruiz şirkətinə qarşı qaldırdığı məhkəmə iddiasında 300.000 dollar təzminat qazanıb. Hadisə kruiz səyahəti zamanı baş verib: qadın 14 qədəh tekila içdikdən sonra yıxılaraq kəllə-beyin travması alıb.

Sonxeber.az xarici mediaya istinadən xəbər verir ki, həmin gün Diana səkkiz saat yarım ərzində gəmidəki altı barı gəzib. Turistin həddindən artıq sərxoş olduğu hər kəsə bəlli idi - o, müvazinətini itirmişdi, kəlmələri kəsik-kəsik deyirdi, "Mən tekila qızıyam!" deyə qışqırır və nalayiq zarafatlar edirdi. Buna baxmayaraq, barmenlər ona içki verməyə davam edirdilər.

Nəticədə qadın yıxılaraq ağır xəsarət alıb. Məhkəmə zərərçəkmişlə razılaşıb ki, Sandersin aldığı xəsarətlərin 60%-i şirkətin təqsiri ucbatındandır, çünki əməkdaşlar ona həddindən artıq spirtli içki təqdim ediblər.

Qələbədən sonra Diana mediaya verdiyi açıqlamada nəticədən razı qaldığını və aldığı travmaya baxmayaraq, tekiladan hələ də imtina etmədiyini bildirib.

Telegramda izləyin