Sürücünün baxışlarından qorxan qadın özünü magistral yola atdı - VİDEO

Malayziyanın Klang bölgəsində baş verən hadisə dünya mediasında geniş rezonans doğurub.

Sonxeber.az xarici mediaya istinadən xəbər verir ki, səhər saatlarında hərəkətdə olan taksidən gənc qadının qəfil özünü yola atması nəticəsində magistral yolda nəqliyyat demək olar ki, dayanıb.

Polisin məlumatına görə, adının açıqlanmasını istəməyən qadın taksi sürücüsünün ona narahatedici şəkildə baxdığını iddia edib. Güclü panik və anksiyete keçirən sərnişin özünü təhlükədə hiss edərək avtomobilin qapısını açıb və asfalta atılıb.

Hadisə anı avtomobil kamerasına düşüb. Kadrlarda qadının yola düşərkən ayaqqabıları və telefonunun kənara sovrulduğu görünür. Arxadan gələn avtomobillərin son anda əyləc etməsi isə daha ağır nəticələrin qarşısını alıb.

Yüngül xəsarət alan qadın yaxınlıqdakı klinikaya yerləşdirilib. 47 yaşlı taksi sürücüsü hadisədən sonra polisə məlumat verib və onunla bağlı araşdırma başlanılıb. Sürücünün hərəkətlərində hər hansı qəsd və ya təcavüz elementi olub-olmadığı yoxlanılır.

Hadisə sərnişin təhlükəsizliyi ilə bağlı narahatlıqları yenidən gündəmə gətirib.

Telegramda izləyin